NU walang balak bumitaw kontra Adamson

MANILA, Philippines —  Muling kakapit ang defending champion National University kay super rookie Samantha Cantada upang masikwat ang pandiinang panalo kontra Adamson University sa UAAP Season 88 collegiate women’s volleyball tournament na lalaruin sa UST Quadricentennial Pavilion sa España, Manila.

Pakay ng Lady Bulldogs na palakasin ang kapit sa second spot ng team standings, kasalukuyang hawak nila ang 7-3 karta habang solo sa tuktok ang last year’s runner-up na De La Salle University na walang mantsa matapos ang 10 laro.

Magsisimula ang girian ng NU at Adamson sa alas-5 ng hapon habang sa alas-11 ng umaga ang kaldagan ng UST at UE.

Habang papalapit na ang semifinals ay importante ang bawat panalo, mahirap makabangon kapag nadadapa sa laban.

“For me, hindi pa tapos yung laban just because natalo kami ng isang game. Siguro, ang inisip lang namin agad ay what’s next? And also kailangan talaga naming mag-move forward kasi may mga next games pang nakaabang sa amin,” ani graduating setter Lams Lamina.

Bukod kina Cantada at Lamina, kukuha rin ng lakas ang Lady Bulldogs kina Evangeline Alinsug, Arah Ella Panique at Alexa Michole Mata.

Pursigido naman ang Lady Falcons na malampasan ang performance nila nakaraang taon, asam din nilang makabalik sa Final Four matapos ang tatlong taong pagliban.

Samantala, lahat ng laro ay mapapanood ng live sa Pilipinas Live app, One Sports, at  sa UAAP Varsity Channel.