Wolves nakatikim na ng panalo sa Boston

BOSTON - Kumamada si Bones Hyland ng 23 points at may 19 markers si Jaden McDaniels sa 102-92 panalo ng Minnesota Timberwolves sa Celtics para tapusin ang kanilang 18-game losing slump sa Boston.

Hindi naglaro si All-Star guard Anthony Edwards sa ikaapat na sunod na pagkakataon dahil sa kanyang right knee inflammation.

Nag-ambag si Ayo Dosunmu ng 17 points, 8 rebounds at 6 assists habang humakot si center Rudy Gobert ng 14 rebounds para sa Minnesota (44-28) na huling nanalo sa Boston (47-24) noong 2005.

Bumira si Jaylen Brown ng 29 points at naglista si Jayson Tatum ng 16 points at 11 rebounds para sa Celtics na nagtapos ang four-game winning streak.

Isang 16-0 bomba ang inihulog ng Timberwolves sa gitna ng fourth quarter matapos maiwanan sa 80-81.

Kasama sa nasabing atake ng Minnesota ang walong sunod na puntos ni Naz Reid na nagbalik sa aksyon matapos ang two-game absence dahil sa isang sprained right ankle.

Naisuko ng Boston ang hawak na 15-point lead at naiwanan sa halftime, 44-47.

Naglista ang Celtics ng 1-of-9 shooting sa 3-point area habang tumipa ang Wolves ng 1 for 7 clip.

Sa iba pang laro, sinunog ng Phoenix Suns ang Toronto Raptors, 120-98; pinatumba ng Denver Nuggets ang Portland Trail Blazers, 128-112; panalo ang Sacramento Kings sa Brooklyn Nets, 126-122; at dinaig ng New York Knicks ang Washington Wizards, 145-113.