Rain or Shine miduhig sa PBA debut ni Bol Bol

CEBU, Philippines — Naminghoy ang kanhi NBA player nga si Bol Bol sa iyang PBA debut uban sa TNT Tropang 5G.

Kini human gibuntog sa Rain or Shine Elasto Painters ang TNT, 112-110, sa PBA Season 50 Commissioner’s Cup niadtong Biyernes sa gabii, Marso 20, didto sa Smart Araneta Coliseum sa Quezon City.

Si Adrian Nocum ang bida sa RoS uban ang 20 puntos ug 11 ka rebounds apil na ang iyang semi-hook shot atubangan sa 7-foot-3 nga si Bol sa hilimatyong segundos nga maoy nagsilyo sa kulbahinam nilang daog. Ang E-Painters mikadlit sa ikaduha nilang sagunson nga daog bisan og na-ejected ang import nilang si Jaylen Johnson uban ni Glenn Khobuntin sa TNT human ang duha nagkabangi sa pinal nga 6:20 sa duwa.

Si Johnson nakamaneho gihapon pagpupo og 33 puntos, siyam ka rebounds, tulo ka assists ug tulo ka steals.

Sa iyang bahin, si Bol mihimo og impresyon uban ang 38 puntos, 16 ka rebounds ug lim aka blocks bisan og na-foul trouble. Nagkasumpaki sila ni Caelan Tiongson sa sayong bahin sa mainit nga aksiyon ug nagisian ang wala niyang aping human aksidente siyang nasikhan ni Luis Villegas sa nahibiling 1:54 sa duwa.

Sa laing sangka, ang Barangay Ginebra Kings nalihian og daog human ilang gikastigo ang guest team Macau Black Knights, 110-93.

Si Justin Brownlee misikad sa ika-13 niyang komperensiya sa PBA uban ang mangtas nga performance diin siya miharos og 31 puntos, 10 ka rebounds, lima ka assists, duha ka steals ug duha ka blocks.

Mihimo sab og kasikas si RJ Abarrientos uban ang 25 puntos, unom ka rebounds ug pito ka assists aron tabangan ang Ginebra pagpatilaw sa Black Knights sa ikatulo niining sunod-sunod nga pildi.