Consolacion molusad sa ilang grassroots basketball program

CEBU, Philippines — Nadasig sa ilang tinguha nga bairon ang abilidad sa batan-on nilang mga basketbolista ug makadiskubre og bag-ong mga talento, ang munisipalidad sa Consolacion sa amihanang bahin sa Sugbo molusad og komprehensibong grassroots basketball program sunod bulan.

Gikatakda nga mosikad karong Abril 1, ang 1st Mayor Teresa Alegado Cup Summer Developmental Basketball League mopasundayag sa abilidad sa mga masaarong magduduwa gikan sa 21 ka mga barangay sa lungsod sa tulo ka mga age groups:12, 15, ug 17 Under. Ang mga partisipanteng teams gibahin sa upat ka grupo nga moduwa ubos sa usa ka double round robin, home-and-away format.

Human sa eliminasyon, ang Top 4 matag cluster moabante sa semifinals diin ang Top 2 adunay twice-to-beat advantage.

Ang mga mananaog magsangka sa titulo sa tagsa-tagsa nila ka mga clusters.

Ang mga kampiyon mag-abot dayon sa "The Champions League".

Human sa torneyo, ang mga organizers nga gipangulohan ni coach Paul Alelu Flores mopili og mga potensiyal nga maoy moporma sa ilang developmental training pool sa tulo ka mga kategoriya.

Kadtong masigpatan moagi og makuti nga pagbansay-bansay ubos sa garbong mga coaches sa Consolacion uban ang tinguha nga makatukod og lig-ong mga teams nga makarepesenta sa lungsod sa umaabot nga mga kompetisyon.

"By then, the players will have a chance to be scouted by different school-based coaches and hopefully play in the Cebu Schools Athletic Foundation, Inc. (CESAFI)," matud pa ni Flores, nga makigtambayayong sa iyang deputy commissioners nga sila si Stordy Majarocon, Agvin Jugan, Lee Mhar Dahil ug John Paulo Dalumpines pagpadagan ning mahinungdanong kalihukan.

"We want to reach out and teach the game of basketball to the youth and open up brighter opportunities for them along the way. That is really our ultimate goal. If we can achieve that, it's the time we can consider this worthwhile project a success," dugang pa ni Flores.

Ang dalayong programa hugyanong gipaluyohan sa Consolacion LGU nga gipangulohan ni mayor Teresa "Nene" Alegado inabagan sa Sangguniang Kabataan Federation (SKF) ubos sa liderato ni Shella Arela Carpina ug mga miyembro sa sports committee nga naglangkob nilang Leo Napuli, Rex Pepito, Mikko Ouano, Wesley Alimoren, ug Marilou Casul.

"The league highlights the importance of sports in shaping the youth by promoting physical fitness, teamwork, perseverance, and sportsmanship at an early age," kanayon pa ni Carpina. "It reflects the commitment of the local government to strengthen grassroots sports while providing a positive and healthy environment where athletes can develop their skills and confidence."

  "It is also expected to foster camaraderie among different barangays, discover promising talents, and inspire the youth to pursue excellence both on and off the court, reinforcing the vision of building a strong, healthy, and united Municipality of Consolacion through sports," dugang pa ni Carpina.