Dumanjug maoy mo-host sa pormal nga pagbukas sa 1st Calderon Cup

CEBU, Philippines — Ang lungsod sa Dumanjug nga gipangulohan ni mayor Gungun Gica maoy mo-host sa pormal nga pagbukas sa labing unang Calderon Cup Inter-Town 21 Under Basketball Tournament karong Marso 21.
Gipahibawo kini sa representante sa Dumanjug nga si Christopher Co atol sa usa ka coordination meeting uban sa mga nagorganisa sa liga nga gipangulohan ni Atty. Ramil Abing didto sa munisipyo sa Moalboal ning bag-ohay pa lamang.
Ang tanang walo ka local government units (LGUs) nga naglangkob sa 7th District mosalmot ning grassroots nga inisyatiba ni kongresista Patsy Calderon kansang tinguha mao ang paghatag sa mga kabatan-onan sa distrito og oportunidad nga mapasundayag ang ilang abilidad ug sa susamang higayon madiskubre og mga talento. Magpinaksitay alang sa titulo mao ang Dumanjug, Moalboal, Alcantara, Ronda, Moalboal, Alegria, Badian, ug Ginatilan.
Gibahin sila sa duha ka grupo nga moduwa og double round robin sa home-and-away format.
Ang top seed matag bracket human sa eliminasyon awtomatik nga moabante sa semifinals. Ang No.2 ug No.3 teams mag-abot sa crossover quarterfinals alang sa laing duha ka luna sa semis.
Ang mga mananaog maoy mag-abot sa kampiyonato sa usa ka best-of-three series.
Gawas sa tropeyo, ang manghawod sa torneyo ingon man ang mopahiluna sa ikaduha ngadto sa ikaupat nga dapit makadawat og ganting salapi.
- Latest
















