PSN Palaro

Altas jersey ni Hawkins iniretiro

Pilipino Star Ngayon

February 21, 2026 | 9:25pm

Itinaas ni Rene ‘Bong’ Hawkins’ ang plake na kumikilala sa kanyang makasaysayang Perpetual Altas jersey number 12 na iniretiro nitong Biyernes sa Home of the Altas Gym II kasama sina University President Anthony Tamayo, Vice President for Sports Anton Tamayo at Dr. Arnaldo De Guzman, School Director sa pagtatapos ng University Week celebration kasabay ng 50th Foundation Anniversary ng Perpetual Help System Dalta-Las Pinas campus.

MANILA, Philippines — Pormal na iniretiro ng University of Perpetual Help System-DALTA ang Altas jersey No. 12 ni PBA legend Rene "Bong" Hawkins Jr. sa Home of the Altas Gym II sa Las Piñas City.

Ang seremonya ang naging tampok sa pagtatapos ng University Week celebration kasabay ng 50th Foundation Anniversary ng Perpetual Help.

Nakasama ni Hawkins sa event sina UPHSD president Dr. Anthony Tamayo, Vice President for Sports Anton Tamayo at School Director Dr. Arnaldo De Guzman.

“It's an honor and pride to be one of the athletes to have a jersey retirement like this,” sabi ni Hawkins, ang eight-time PBA champion forward.

“Nagpapasalamat po ako sa Tamayo Family, specially to Sir Tony, Ma'am Daisy, Sir Anthony, our President and Anton Tamayo, Vice President for Sports sa parangal na ito,” dagdag nito.

Si Scottie Thompson ng Barangay Ginebra ang unang varsity player ng Perpetual Help na iniretiro ang Altas jersey No. 6 noong Pebrero 16, 2023 kasabay ng kanilang 48th Foundation Day.

Si Hawkins ang unang Altas product na nagkaroon ng matagumpay na basketball career at nakasama sa 50 Greatest Players ng Philippine Basketball Association.

Hinirang siyang PBA Finals MVP sa 1996 Commissioner's, ang 1994 PBA Most Improved Player, nakasama sa 1994 PBA All-Defensive Team, isang two-time PBA Mythical Second Team (1994 at 2000) at two-time PBA Mythical First Team (1995 at 1996).

Kinilalang "The Hawk" dahil sa kanyang all-around play, naglaro si Hawkins para sa Altas noong 1984 hanggang 1989 sa ilalim ni head coach Roberto Littaua.

Nakasama ni Hawkins sa tropa sina Eric Quiday at Ronald Sy na natalo sa defending champion San Sebastian Golden Stags sa NCAA Season 65 Finals noong 1989.