Vitor, Tapales nangapildi sa Russia

CEBU, Philippines — Ang mga Pinoyng boksidor nga sila si Virgel "Valiente" Vitor ug Gabriel Tapales nangapakyas sa ilang misyon nga makabira og rehiyonal nga titulo human sila gipatikangkang sa tagsa-tagsa ka Russian nilang mga kontra niadtong Biyernes (Sabado, Pebrero 14 oras dinhi sa Pilipinas) didto sa USC Soviet Wings sa Moscow, Russia.

Si Vitor sa PMI Bohol Boxing Stable mipakita og igong katakos apan sa kadugayan gipahagba gyud siya ni Artur Subkhankulov sa ika-10 ug katapusang hugna sa ilang International Boxing Federation (IBF) Asia lightweight championship bout.

Ang 28-anyos nga si Vitor natagak sa 24-5 uban ang 17KOs samtang si Subkhankulov miinat sa way pildi niyang ratsada ngadto sa 11-0 nga gidayan-dayanan na karon og 5KOs.

Nadoble ang kagul-anan sa mga bisitang Pinoy gumikan kay si Tapales sa Sanman Gym nga nakabase sa General Santos City nalukapa sab sa mga kamot ni Aznaur Kalsynov sa samang promosyon.

Si Kalsynov way poas nga mipaulan og mahait nga mga suntok ngadto sa tiyan ni Tapales nga nakapaaghat sa reperi pag-unang sa sangka sa ikaunom nga hugna.

Si Kalsynov nagkupot na karon og 7-1-3 rekord samtang gilabni ang IBF Asia featherweight belt human miposte sa una niyang daog pinaagi sa knockout.

Si Tapales, manghud ni kanhi unified super bantamweight world champion Marlon "The Nightmare" Tapales, naparot sa ikaduha pa lamang nga higayon sa 11 ka away uban ang 6KOs.