Bolts napakyas sa ilang misyonsa EASL

CEBU, Philippines — Wala makab-ot sa Meralco Bolts ang ilang tinguha nga makasud sa East Asia Super League (EASL) playoffs sa unang higayon.

Kini human gipalagpot sila sa Ryukyu Golden Kings, 88-79, sa krusyal nilang sangka niadtong Miyerkules sa gabii didto sa Smart Araneta Coliseum.

Nakasikit unta ang Bolts ngadto na lang sa singko puntos human sila malubong og 20 puntos, 54-74, sa naghinapos nga bahin sa ikatulong kuwarter.

Apan ang Golden Kings sa Japan B. League milansang og upat ka sagunson nga free throws sa hilimatyong segundos sa duwa aron idiskonekta ang Bolts.

Isip No.1 seed sa Group B uban ang 5-1 rekord, ang Golden Kings miangkon og luna sa EASL Finals nga gikatakda karong Marso 18-20 didto sa Macau.

Samtang ang Bolts mitapos sa ilang kampanya bitbit ang labing nindot nilang 3-3 nga baraha sukad sila miapil sa liga, butang nga gikalipay ni assistant coach Luigi Trillo.

“We feel bad, but overall we’re proud of our team,” matud pa ni Trillo.