Cheetahs nakasagunson og daog

CEBU, Philippines — Ang Benedicto College (BC) Cheetahs mibuntog sa University of San Carlos (USC) Warriors, 69-63, alang sa ikaduha nilang sunod-sunod nga daog sa 2026 Bulacao-Talisay Inter-Collegiate Basketball Tournament niadtong Martes sa gabii, Pebrero 3, didto sa Bulacao Sports and Cultural Center sa dakbayan sa Talisay.

Si Serge Gabines ang bida sa Cheetahs human mipabuto og 20 puntos. Mihimo sab hinoon og kasikas si Kenneth Babalcon uban ang 16 puntos ingon man si Den Rick Orgong nga mitali og 13 puntos alang sa kampo ni coach BJ Murillo nga nanginahanglan na lang og usa ka daog aron motikang sa finals. Sa laing bahin, ang University of the Visayas (UV) Green Lancers namawi sa miagi nilang kaparotan uban ang 86-78 nga pagpakaging sa University of Cebu (UC) Webmasters.

Si Steven Cañete maoy nangu sa lima ka players sa UV nga mirehistro og double figures bitbit ang 17 puntos.

Sila si Karl Cabulao ug AJ Sacayan parehong mitali og 15 puntos, si Rovello Robles mi-iskor og 12 samtang si Ivan Clark Alsola mitimbre og 10 puntos sa balanseng opensiba sa Lancers.