Rodex Piala napakyas sa iyang misyon
CEBU, Philippines — Si Rodex "The Tank" Piala napakyas sa iyang tinguha nga mosakmit og laing rehiyonal nga korona didto sa langyaw nga lapyahan.
Kini human ang Sugbuanong boksidor nakatilaw og mapait nga kapildihan pinaagi sa 4th round knockout sa mga kamot ni World Boxing Organization (WBO) International super featherweight champion Liam Wilson niadtong Biyernes, Enero 16, didto sa Brisbane Entertainment Centre sa Brisbane, Australia.
Ang 29-anyos nga si Wilson mipatikangkang ni Piala sa hingpit gamit ang makasug nga body punch sa katapusang kuwatro segundos sa ikaupat nga hugna.
“I’m blessed with the left hand but we had to box the right fight,” matud pa ni Wilson ngadto ni Declan Warrington sa Boxing Scene. “He was a tricky customer. I got the job done and on to the next.”
Si Wilson, nga miinat sa iyang rekord ngadto sa 18-3 uban ang 10KOs, buot nga makig-rematch sunod uban sa Meksikanong si Emmanuel Navarrete, ang kasamtangang hari sa WBO junior lightweight division.
Samtang si Piala naparot sa ikaduha pa lamang nga higayon sa 14 ka away uban ang usa ka knockout.
- Latest
