Hornets nagmangtas, mipakurat sa Thunder

CEBU, Philippines —  Ang Charlotte Hornets milampaso sa defending champion Oklahoma City Thunder, 124-97, sa NBA kagahapong adlawa didto sa Paycom Center sa OKC.

Makapakugang ang maong resulta diin ang ika-12 nga koponan sa Eastern Conference mibihag sa team nga dunay labing nindot nga rekord ning season.

Si Brandon Miller miharos og 28 puntos samtang si Kon Knueppel midugang og 23 puntos alang sa Hornets, nga milupig sa Thunder sa rebounding, 52-33, ingon man sa second-chance points, 23-13. Lima ka OKC players ang mikadlit og double figures nga gipangulohan ni Shai Gilgeous-Alexander uban ang 21 puntos.

Apan naputol ang 24 ka sagunson nga daog sa Thunder batok sa mga kontra nila gikan sa East. Mao pa lamang kini ang ikapitong pilde sa Thunder.

Wala hinoon maalarma si Thunder coach Mark Daigneault bisan og naparot sila sa ikaunom nga higayon sa miagi nilang 12 ka duwa nga nakapahagsa sa ilang baraha ngadto sa 30-7.

Didto sa Detroit, si Cade Cunningham mitali og 29 puntos ug mipasa og 13 ka assists aron ituboy ang Pistons ngadto sa 121-90 nga paglampornas sa New York Knicks.

Ang Pistons, nga nagkupot na karon og 27-9 nga marka, miinat sa ilang labaw sa East ngadto sa upat ka duwa batok sa Boston Celtics, nga milabay sa Knicks alang sa ikaduhang dapit sa komperensiya human giihaw ang Chicago Bulls, 115-101.

Dako sab og naambag sila si Javonte Green ug Jaden Ivey nga nagkumboya'g 33 puntos alang sa Pistons.

Si Jalen Brunson mibirada og 25 puntos alang sa Knicks apan wala siya makakuha og igong suporta gikan sa iyang mga kauban ilabi na sa mga sinaligan nilang sila si Karl-Anthony Towns ug OG Anunoby