Tres ni Booker misalbar sa suns batok sa Thunder

CEBU, Philippines — Si Devin Booker miposa sa iyang tres sa pinal nga segundo aron aswaton ang Phoenix Suns ngadto sa 108-105 nga pagpakurat sa defending champion Oklahoma City Thunder sa NBA kagahapong adlawa didto sa Mortgage Matchup Center sa Phoenix, Arizona.

Ang Suns mipapas sa 18 puntos nilang alkansi aron makabawos sa labing bati nga kapildihan sa kasaysayan sa ilang prangkisa nga ilang nahiaguman sa mga kamot sa Thunder sa iskor nga 138-89 sa NBA Cup quarterfinals sa miaging bulan.

Si Gilgeous-Alexander mihipos og 25 puntos samtang si Jalen Williams midugang og 23 puntos apan ang Suns mipakgang sa upat ka sagunson nga daog sa Thunder.

Nagkupot pa hinoon gihapon ang Thunder sa labing nindot nga 30-6 rekord ning season.

Didto sa Cleveland, ang Detroit Pistons mipahugot sa ilang pagkupot sa liderato sa Eastern Conference bitbit ang 26-9 nga baraha human gipayaka nila ang Cavaliers, 114-110.

Tam-is ang maong kadaogan alang Pistons, nga gipilde sa Cavs sud sa 13 ka higayon sa miagi nilang 14 ka engkwentro.

Si Cade Cunningham maoy nangu sa Pistons uban ang 27 puntos, unom ka rebounds, pito ka assists, duha ka steals ug usa ka block samtang si Daniss Jenkins mi-iskor og 25 puntos, 21 niini iyang gibirada sa ikaduhang kuwarter diin siya way sipyat sa pito niya ka itsa apil na ang unom ka tres.

Luyo sa pagmangtas ni Jenkins, ang Pistons milampaso sa Cavs sa maong kuwarter, 47-28, aron himoan ang nuybe puntos nilang alkansi ngadto sa 10 puntos nga bentaha sa halftime.

Igo lamang nakasikit ang Cavs ngadto sa dos puntos sa pinal nga 76 segundos gumikan kay si Jenkins milansang og duha ka free throws aron silyohan ang daog sa Pistons ug inaton ang ilang labaw sa Eastern Conference standings batok sa New York Knicks ngadto sa tulo ka duwa.

Sa laing bahin, ang Indiana Pacers nasugamak sa ika-12 nilang sagunson nga pilde human sila giparotan sa Orlando Magic, 135-127.

Si Desmond Bane miharos og 31 puntos alang sa Magic, nga mitagak og 17-0 nga bomba sa ikaduhang kuwarter aron kontrolahon ang duwa sa hingpit.

Si Pascal Siakam mipabuto og 34 puntos apan nakawang ang maanindot niyang salida gumikan kay ang Pacers mitabla sa ilang franchise record alang sa labing taas nilang sunod-sunod nga pilde.

Ang Pacers nasagunsonan og 12 ka pilde sa ikaupat na nga higayon sa kasaysayan sa ilang prangkisa. Katapusan kini nilang nadangatan niadto pang 1989.