Dunk ni Giannis misalbar sa Bucks

CEBU, Philippines —  Si Giannis Antetokounmpo mi-dunk sa bola sa pinal nga nga 4.7 segundos aron aswaton ang Milwaukee Bucks ngadto sa kulbahinam nga kadaogan batok sa Charlotte Hornets, 122-121, sa NBA kagahapong adlawa didto sa Fiserv Forum Center sa Milwaukee, Wisconsin.

Nahimong mas espesyal ang gabii ni Antetokounmpo gumikan kay mikulit siya og rekord human mirehistro og 30 puntos, 10 ka rebounds, ug lima ka assists sa ika-158 na nga duwa nga maoy labing daghan sa kasaysayan sa NBA. Iyang gilabyan sila si Kareem Abdul-Jabbar ug Oscar Robertson nga maoy nagkupot sa karaang marka.

Bangis kaayo si Antetokounmpo nga mibubo og 12 sa iyang 30 puntos sa katapusang kuwarter aron tabangan ang Bucks pagsilyo sa ikatulo nilang daog sa miaging upat ka duwa nga nag-inat sa ilang baraha ngadto sa 15-20.

Sa laing bahin, ang defending champion Oklahoma City Thunder romped miposte og 131-94 nga kadaogan batok sa Golden State Warriors nga miduwa nga wala ang tulo nila ka mga bitoon nga sila si Stephen Curry, Draymond Green ug Jimmy Butler. Si Shai Gilgeous-Alexander mipabuto og 30 puntos samtang si Chet Holmgren midugang og 15 puntos, 15 ka rebounds ug upat ka blocks alang sa Thunder, nga maoy unang team nga mikadlit og 30 ka daog ning season.

Didto sa Cleveland, si Donovan Mitchell miharos og 33 puntos ug si Darius Garland midonar og 18 puntos sa dihang gipakaging sa Cavaliers ang Denver Nuggets, 113-108.

Sa ubang mga resulta, si De'Aaron Fox mikolekta og 24 puntos ug pito ka rebounds aron pangulohan ang San Antonio Spurs ngadto sa 123-113 nga pagpaksit sa Indiana Pacers samtang si Jalen Johnson miposte og triple-double sa ikapitong higayon ning season uban ang 18 puntos, 10 ka rebounds ug 11 ka assists aron ibandera ang Atlanta Hawks ngadto sa 111-99 nga pagdagit sa New York Knicks.