PBA semis mosikad na karong adlawa

CEBU, Philippines —  Magbangga na ang duha ka sister teams gumikan kay ang best-of-seven PBA Season 50 Philippine Cup semifinals mosikad na karong adlawa (Domingo, Enero 4) didto sa Smart Araneta Coliseum.

Mohagit sa defending champion San Miguel Beer ang igsoon nilang koponan nga Barangay Ginebra sa usa ka dumot nga rematch sa All-Filipino Cup semifinals sa miaging season diin ang Beermen mipatigbabaw sa tinagakay nga Game 7.

Magbugno sila sa main game nga gikatakda sa alas 7:30 sa gabii.

Ang Beermen, nga maoy labing init nga team ning komperensiya uban ang 10 ka sagunson nga daog, miabante sa sunod nga hugna sa torneyo human gipalagpot ang NLEX Road Warriors, 101-94, niadtong adlaw sa Pasko.

Samtang ang Gin Kings miangkon og luna sa semis human gipabakasyon ang twice-to-beat nga Converge FiberXers pinaagi sa makapaisa'g balahibo nga kadaogan, 99-98, sa overtime.

Sa laing habig sa Final Four, ang TNT Tropang 5G makigharong sa Meralco Bolts sa alas 5:15 sa hapon nga pasiunang duwa.

Ang TNT nanginahanglan lamang og usa ka daog aron idispatsar ang Magnolia Hotshots, samtang ang Meralco mitagak sa twice-to-beat nga Rain or Shine Elasto Painters aron buhion ang ilang paglaum nga masakmit ang gihandum nilang titulo.