Fajardo nangu sa karera alang sa BPC award
CEBU, Philippines — Ang Sugbuanong higante sa San Miguel Beer nga si June Mar Fajardo dako'g puruhan nga moinat sa iyang rekord ngadto sa 13 ka Best Player of the Conference awards.
Kini tungod kay pagkahuman sa PBA Season 50 Philippine Cup quarterfinals, si Fajardo maoy nag-una sa karera alang sa prestihiyosong indibidwal nga pasidungog uban ang 45.4 average statistical points gikan sa iyang average nga 17.4 puntos, 15.3 rebounds, 6.1 assists ug 1.1 blocks matag duwa.
Si Calvin Abueva sa Titan Ultra, ang top scorer ning komperensiya uban ang average nga 23.6 puntos matag duwa, nahimutang sa ikaduhang dapit, bitbit ang 41.2 SPs.
Nagsunod ni Abueva ang duha ka batos sa Converge nga sila si Juan Gomez de Liano ug Justine Baltazar nga parehong adunay 37.2 SPs samtang si Zav Lucero sa Magnolia ang mi-okupar sa ikalimang puwesto uban ang 33.8 SPs.
Naglangkob sab Top 10 mao sila si Joshua Munzon sa Titan Ultra (33.6), CJ Perez sa SMB (32.92), Calvin Oftana sa TNT (32.91), Justin Arana sa Converge (32.6), ug CJ Cansino (31.2) sa Meralco.
Mihayag og samot ang tsansa ni Fajardo nga mobira ang ika-13 niyang tropeyo isip BPC gumikan kay ang duha sa labing sikit niyang mga karibal nga sila si Abueva ug De Liano wala na sa aksiyon gumikan kay natagak naman ang tagsa-tagsa nila ka mga koponan.
Gawas ni Fajardo, sila na lang si Perez, Oftana, Cansino, RJ Abarrientos, Don Trollano, Stephen Holt, Scottie Thompson ug Chris Newsome ang nagduwa pa sa semis.
- Latest
