Wala nay salig
Problemado nang daan ang saad nilang Presidente Ferdinand Marcos Jr., Department of Public Works and Highways (DPWH) Secretary Vince Dizon ug sa managsuong Ombudsman Boying Remulla ug Department of Interior and Local Government (DILG) Secretary Jonvic Remulla nga dunay maprisong mga senador ug mga kongresista sa wala pay Pasko.
Kay dili nila kontrolado ang mga korte (bisan daghang pasangil nga madiktahan ang pipila ka huwes). Dili nila mapugos ang mga huwes pagluwat dayon og arrest warrants. Kay mahimong mangayo og dugang lugway ug unya na molihok human sa bag-ong tuig.
* * *
Tuod man, matapos na lang ang 2025 wala pay dagkong isda nga napriso. Sayop ang pagwara-wara sa Malakanyang sa magtiayong Discaya. Kay si Sarah Discaya dili maoy kinadak-an og kawat kon dili ang kakonsabong mga politiko sa ilang mga kontrata. Ug si Curlee Discaya wala pa makiha, natanggong lang tungod sa contempt sa Senado.
Wala pay politikong napriso dili tungod sa kalangayan sa korte. Kon dili tungod kay igo lang diay nga nagpa-ukyab silang Marcos, Dizon ug mga Remulla aron pagkumbinser sa katawhan nga seryuso ang imbestigasyon sa administrasyon.
* * *
Dili mabasol ang katawhan nga masuk-anong naningil sa wala pagkatuman sa saad. Kay gisuroy sa DILG ang mga sakop sa media sa mga prisohan sa Bureau of Jail Management and Penology (BJMP) pagpakita nga andam na pagdawat sa bag-ong mga piniriso.
Gani, gipaandam og apil ang Bureau of Corrections (Bucor) sa ilang super maximum prison sa Occidental Mindoro aron nga maoy balhogan sa gibanabanang 8,000 ka mga sinumbong sa grabeng kinawatay.
* * *
Maong wala nay motuo sa bag-ong pasalig sa Malakanyang nga mapriso na gyong mga politiko liwas sa bag-ong tuig. Wala nay naminaw sa ilang garantiya nga wala mahuman ang imbestigasyon niadtong Pasko sa P1.7 trilyones nga flood control scandal.
Makuha lang nila ang pagsalig sa mga magbubuhis kon mangayo sila og pasaylo nga bakak diay ang ilang mga saad. Ug labi na gyod kon tinud-on na gyod sa pagsusi ang tanang mga ebidensiya (bisan kinsa pa ang nagbisto) ug ikiha ug prisuhon ug silotan ug bawian sa kinawat ang mga responsable (bisan unsa kadako ug kasuod sa presidente).
* * *
- Latest
