Thunder mipakgang sa sagunson nilang pilde

Kawhi mipaulbo og career-high 55 puntos sa Clippers

Si Chet Holmgren mikadlit og 29 puntos ug siyam ka rebounds aron pangulohan ang defending champion Oklahoma City ngadto sa 129-104 nga paglampornas sa Philadelphia 76ers sa NBA kagahapong adlawa didto sa Paycom Center sa OKC.

Ang reigning MVP nga si Shai Gilgeous-Alexander midugang og 27 puntos, lima ka assists, duha ka steals ug duha ka rebounds alang sa Thunder nga mipakgang sa duha ka sagunson nilang pilde aron inaton ang ilang rekord ngadto sa 27-5.

Sa wala pa pakaginga ang Sixers, ang Thunder napilde kaupat sa miagi nilang unom ka duwa, tulo niini batok sa San Antonio Spurs.

Sa laing bahin, si Kawhi Leonard mipaulbo og career-high 55 puntos aron ituboy ang Los Angeles Clippers ngadto sa 112-99 nga pagpaksit sa Detroit Pistons.

Si Leonard mibuak sa karaan niyang marka nga 45 puntos sa dihang nagduwa pa siya uban sa Toronto Raptors.

Si James Harden miamot og 28 puntos sa Clippers, nga nagkupot na karon og 10-21 nga baraha human nakasagunson og upat ka daog.

Sa ubang mga resulta, si Scottie Barnes miposte og triple-double nga 23 puntos, 10 ka assists ug career-high 25 ka rebounds sa dihang gibihag sa Raptors ang Golden State Warriors, 141-127,sn overtime.

Sila si Immanuel Quickley mitimbre ug Brandon Ingram nagkumboya'g 53 puntos alang sa Raptors, nga mipakgang sa tulo ka sunod-sunod nga daog sa Warriors.

Didto sa Los Angeles, si NBA scoring leader Luka Doncic mipabuto og 34 puntos sa dihang gipatikalbong sa Lakers ang Sacramento Kings, 125-101.

Mihimo sab og kasikas si LeBron James uban ang 24 puntos ingon man si Nick Smith nga mipupo og 21 puntos alang sa Lakers.