Buzzer- beater ni Holt misalbar ]sa Ginebra

CEBU, Philippines —  Si Stephen Holt milansang og 3-pointer dayong kapupos ang oras aron bitaron ang Barangay Ginebra Kings ngadto sa makapaisa'g balahibo nga kadaogan batok sa Converge FiberXers, 99-98, sa overtime sa tinagakay nilang duwa sa PBA Season 50 Philippine Cup quarterfinals niadtong Domingo sa gabii didto sa Smart Araneta Coliseum.

Tungod niini, ang Ginebra miabante sa semifinals sa ikawalong sunod-sunod nga higayon.

Sangkaon nila sunod ang defending champion San Miguel Beer. Magsugod ang ilang best-of-seven series sa Enero 4.

Naglabaw unta ang Converge og sayes puntos, 95-89, human sa 4-pointer ni Juan Gomez de Liano sa nahibilin nga 1:38 sa overtime.

Apan sila si RJ Abarrientos ug Troy Rosario mipasud sa krusyal nilang mga itsa aron pagpasikit sa Ginebra ngadto na lang sa usa ka lugas, 95-96, sa pinal nga 20.3 segunds.

Human si Justine Baltazar mipasud og usa ka free throw nga nakahatag sa Converge og dos puntos nga labaw, ang Ginebra miadto ni Holt.

Sa nahibilin nga 8.5 segundos, ang kanhi No. 1 overall pick midawat sa bola ug human gilipat si MJ Garcia, way kurat nga mitira og tres nga mitaop sa ring dungan sa pagkahurot sa oras.

“It’s miraculous to me,” dason pa ni Ginebra coach Tim Cone kabahin sa makapakurat nilang kadaogan.