Giannis, Bucks pinigilan ang Bulls
CHICAGO -- Humataw si Giannis Antetokounmpo ng 29 points sa kanyang pagbabalik mula sa isang eight-game absence para tulungan ang Milwaukee Bucks sa 112-103 pagsuwag sa Bulls.
Kumolekta rin ang two-time MVP na si Antetokounmpo, nagkaroon ng right calf strain, ng walong rebounds sa kanyang pagbabalik sa lineup ng Milwaukee (13-19) sapul noong Disyembre 3.
Nagdagdag si Ryan Rollins ng 20 points at humakot si Bobby Portis ng 17 points at 10 rebounds.
Nagtapos ang five-game winning streak ng Chicago (15-16) na nakahugot kina Nikola Vucevic at Coby White ng tig-16 points kasunod ang 13 markers ni Josh Giddey.
Hawak ang 95-94 bentahe sa huling limang minuto ng fourth quarter, nagsalpak sina Rollins at AJ Green ng tig-isang three-point shot bilang bahagi ng isang 8-0 atake para sa 103-94 kalamangan ng Bucks.
Hindi na nakadikit ang Bulls mula rito.
Sa iba pang laro, umeskapo ang Orlando Magic sa Denver Nuggets, 127-126; wagi ang Phoenix Suns sa New Orleans Pelicans, 123-114; pinasabog ng Houston Rockets ang Cleveland Cavaliers, 117-100; dinaig ng Brooklyn Nets ang Minnesota Timberwolves, 123-107; sinunog ng Miami Heat ang Indiana Pacers, 142-116; at lusot ang New York Knicks sa Atlanta Hawks, 128-125.
- Latest
