Jackermz, JR Consumer Goods mikadlit sa una nilang daog

CEBU, Philippines —  Ang Jackermz Sportswear ug ang JR Consumer Goods mikulit sa una nilang daog sa D'Generals Basketball League Season 2 sa Alta Vista Golf and Country Club sa Barangay Pardo, siyudad sa Sugbo.

Si Jaye Zafra miposte og 16 puntos, lima ka rebounds ug tulo ka assists samtang si Prince AJ Enriquez midugang og 13 puntos, lima ka rebounds ug upat ka assists sa dihang ang Jackermz mipakgang sa duha ka sagunson nilang pilde uban ang 71-56 nga paglampaso sa kanhi way pildeng RJK Centre.

Mihimo sab og kasikas si RC John Caballero bitbit ang otso puntos, duha ka rebounds ug duha ka assists alang sa Jackermz.

Si Andrie Torres mirehistro og 11 puntos, tulo ka rebounds ug upat ka assists alang sa RJK nga naparot sa unang higayon human miabli sa ilang kampanya bitbit ang 2-0 nga baraha.

Sa laing bahin, si Andrei "Wildcat" Reyes mipupo og 19 puntos, unom ka rebounds, ug duha ka assists sa dihang ang JR Consumer Goods nakaipsot sa MCP Architects, 73-72.

Si Jack Aurestila miamot og 11 puntos, tulo ka rebounds, ug upat ka assists samtang si Jerry "Scoring Machine" Singson mitali og 10 puntos, unom ka rebounds, ug lima ka assists aron tabangan ang JR Consumer Goods nga makarekober gikan sa duha ka sunod-sunod nga pilde.

Si Joshua Vinluan mihipos og 12 puntos, unom ka rebounds, ug upat ka assists apan nakawang ang iyang paningkamot kay ang MCP Architects natagak sa 1-2.

Sa laing resulta, ang Still & Motion miinat sa ilang rekord ngadto sa 2-1 human gipayaka ang Jayrubz Online, 56-49.

Si Cynizar Esconde maoy nangu sa Still & Motion uban ang 18 puntos, tulo ka rebounds, ug unom ka assists. Nakakuha siya og dakong suporta gikan nilang Bombie Oca ug Cyril Lapas nga nagkumbinar og 18 puntos, siyam ka rebounds, ug unom ka assists.

Si Roboam Bacusmo adunay 12 puntos, duha ka rebounds ug unom ka assists apan naminghoy siya kay naputol ang duha ka sunod-sunod nga daog sa Jayrubz.