Titan Superflex kampiyon sa CABC 3rd Boysen Cup

CEBU, Philippines — Ang Titan Superflex nagmangtas sa endgame aron pakagingon ang Virtuoso, 104–94, ug langkaton ang korona sa Cebu Architects Basketball Club (CABC) 3rd Boysen Cup didto sa Game Changer Sports Facility sa Barangay Banilad, dakbayan sa Mandaue ning bag-ohay pa lamang.

Ang alas sa Titan nga si Lemuel Aspacio mipakita nganong siya maoy MVP sa torneyo human siya miaulbo og 31 puntos uban ang upat ka rebounds ug tulo ka assists sud sa 26 minutos. Hait kaayo si Aspacio nga mipasud og 11 sa 18 niya ka itsa.

Si Carlos Baltar mitimbre og 18 puntos, siyam ka rebounds ug duha ka assists samtang si Chester Hinagdanan mitali sab og 18 puntos uban ang walo ka rebounds, upat ka assists ug unom ka steals alang sa Titan Superflex, nga alkansi og kuwatro puntos, 82-86, sa pinal nga singko minutos.

Apan ang Titan Superflex mitak-op sa duwa pinaagi sa eksplosibong 22–8 rally aron bughaon ang Virtuoso ug sakmiton ang gihandum nilang titulo.

Si Kurt Damandaman miamot og double-double nga 16 puntos ug 10 ka rebounds uba ang duha ka blocks samtang si Justin Aspacio mikimada og 14 puntos alang sa mga kampiyon.

Si John Therese Buhawe mitapos uban ang 28 puntos, 10 ka rebounds, upat ka assists, duha ka steals ug duha ka blocks, si Philip Bryan Alegado mi-iskor og 23 samtang si Ian Ed Lapina mipupo og 14 puntos ug 11 ka rebounds apan wala mosaler ang maanindot nilang salida alang sa Virtuoso.