Mga sugbuanon misidlak sa 33rd Sea Games

CEBU, Philippines —  Ang mga Sugbuanong atleta ug coaches mihatag og mahinungdanong kontribusyon sa Team Philippines sa bag-ohay pang natapos nga 33rd Southeast Asian (SEA) Games didto sa Thailand.

Si Olympic weightlifter Elreen Ann Ando mikuha na sab og atensiyon sa dihang ang garbo sa Barangay Carreta, dakbayan sa Sugbo nakasagunson og gold medal sa SEA Games, ning higayona sa mas bug-at nga 63?kilogram division.

Gikalipay kini og dako sa Olympian niyang coach nga si Ramon Solis.

Sa iyang bahin, si Cherry Ann “Sisi” Rondina ug ang partner niyang si Bernadeth Pons mituldok sa duha ka dekada nga dominasyon sa Thailand aron langkaton ang labing unang bulawan sa Pilipinas sa beach volleyball.

Nasuwat sab ang kasaysayan sa dihang si Mallie Ramirez nga natawo dinhi sa Sugbo mitabang sa Filipinas pagsakmit sa labing unang gold medal sa Pilipinas sa women’s football.

Misidlak sab ang mga Sugbuanon sa triathlon ubos sa pagtimon ni coach Rolando "Andoy" Remolino.

Ang anak ni coach Andoy nga si Andrew Kim Remolino sa dakbayan sa Talisay nangu sa Team Phl ngadto sa mixed relay gold. Nakapugnit sab siya og duha ka silvers sa individual triathlon ug aquathlon ug bronze sa men’s relay aquathlon.

Si Matthew Justine Hermosa nakamina og gold sa men’s relay ug silver sa aquathlon, samtang si Raven Faith Alcoseba naka-gold sa women’s relay sa triathlon nga iyang gisukipan og silver sa mixed relay aquathlon.

Mihimo sab og kasikas si Jeff Leonard Hortelano nga milabni og bulawan sa mixed ultimate flying disc samtang ang mga coach nga sila si Jasper Cabrera, Jerome Bacarisas ug Ann Antolihao migiya sa Blu Boys ug Blu Girls ngadto sa duha ka bulawanong kalamposan sa softball.

Ang marathoner nga si Artjoy Torregosa nakadaog og silver medal sa una niyang pagsalmot sa prestihiyosong torneyo nga mahitabo kausa lamang sud sa duha ka tuig, samtang ang mga gamers nga sila si Mery Christine Vivero, Rica Fatima Amores, Sheen Perez, Clarisse Cordova, Kaye Alpuerto, and Gwyneth Diagon naka-silver sab sa Mobile Legends.

Si Franklin Ferdie Yee mitunol og silver sa duathlon ingon man si Jay Bryan Baricuatro sa boxing.

Si Miranda Renner, kansang inahan usa ka Sugboanon, miamot og duha ka silver medals sa swimming. Si Melvin Mendoza naka-silver sab sa floorball men’s team, samtang si Angelica Bengtsson miamot og bronze sa women's floorball.

Ang uban nga Sugbuanong bronze medalists naglangkob nilang Arthur Craig “Iggy” Pantino sa men’s team tennis,  Mark Ashley Fajardo sa boxing, Raphael Trinidad sa wakeboarding, Felix Calipusan ug Jeremy Laurence Nopre sa karatedo, Jean Marie Sucalit sa sepak takraw, ug Richard Gonzales, Jann Mari Nayre ug Eljey Dan Tormis sa table tennis.

Ang Team Philippines mitapos sa ilang kampanya sa 2025 SEA Games sa ikaunom nga puwesto uban ang 50 ka golds, 73 ka silver, ug 154 ka bronze.