Team CTR, Golden Knights magbangga sa final

MANILA, Philippines —  Ang Chase Tower Runs (CTR) ug ang Blancas Golden Knights magsangka alang sa korona sa kampiyonato sa Cebu City Christmas Basketball Tournament 2025 karong adlawa (Domingo, Disyembre 21) sa Cebu City Sports Institute Gym sa Barangay Sawang Calero.

Ang tinagakay nga duwa gikatakda sa alas-5 sa hapon human sa gubat alang sa ikatulong dapit tali sa Richieboy Ballers ug Welec Trucking Services sa alas-3 sa hapon.

Luyo sa pagpanginit nilang Emman Calo ug Nic Cabañero, ang CTR miligid sa ikatulo nilang sagunson nga daog pinaagi sa sikit nga desisyon, 92-88, batok sa Welec. Si Calo mitapos uban ang 20 puntos ug duha ka assists samtang si Cabañero midugang og 19 puntos, upat ka rebounds ug usa ka steal.

Mihimo sab og kasikas si William McAloney bitbit ang 12 puntos ug walo ka rebounds ingon man si Michael Maestre nga mitampo og 10 puntos, unom ka rebounds ug duha ka assists.

Sa laing bahin, ang Golden Knights miangkon og luna sa final uban ang 3-1 win-loss rekord human sila nakaipsot sda Mighty Warriors of God, 84-83.

Si Steve Nash Enriquez mibitad sa Golden Knights ngadto sa kulbahinam nga daog uban ang 24 puntos, duha ka rebounds, duha ka assists ug tulo ka steals. Dako sab og naambag sila si Billy Robles ug Chris Catarong nga nagkumboya'g 22 puntos, pito ka rebounds ug upat ka assists.

Ang modaog sa engkwentro tali sa CTR ug Golden Knights mobulsa og P200,000 nga ganting salapi.