‘SiPons’ reyna ng SEAG women’s beach volley

MANILA, Philippines —Tinuldukan ng Alas Pilipinas ang 22 taong pagrereyna ng Thailand sa beach volleyball matapos itarak ang 2-0 demolisyon sa finals ng 2025 Southeast Asian Games na gi­na­nap sa Jomtien Beach sa Chonburi, Thailand.

Unang umarangkada sina Sisi Rondina at Ber­na­deth Pons o mas kilalang ‘SiPons’ nang matikas nilang palugmukin sina two-time gold medalists Worapeerachayakorn Kongphopsarutawadee at Taravadee Naraphornrapat ng Thailand, 1-0, para makuha ang bentahe sa best-of-three duel.

Hindi naman na hina­yaan nina Sunny Villapan­do at Dij Rodriguez na umabot sa deciding Game 3 ang serye matapos ilusot ang pukpukang 21-13, 17-21, 15-6 panalo laban Thailand-B para tuluyang angkinin ng Pilipinas ang gintong medalya.

Ito ang unang gintong medalya ng Pilipinas sa beach volleyball ng SEA Games, habang nahuba­ran ng korona ang Thailand na dinomina ang event sapul noong 2003 Ha­noi SEA Games.

Magandang panalo ito para sa Alas Pilipinas lalo pa’t nabigong makapasok sa podium ang Alas Pilipinas women’s indoor volleyball team na natalo sa Indonesia sa bronze-medal match.

Masayang-masaya sina Rondina at Pons na tunay na nagbuhos ng dugo’t pawis upang ma­abot ang inaasam na gintong medalya.

Sa katunayan, kumalas muna sina Rondina at Pons sa kani-kaniyang mother clubs sa indoor volleyball para paghandaan ang SEA Games.