Miller suspendido sa Game 2

MANILA, Philippines — Pupuntiryahin ng San Beda University ang kanilang ika-24 korona na wala si Fil-American guard Janti Miller.

Ito ay dahil sa automatic suspension kay Miller matapos makuha ang ikalawang technical foul sa 89-70 pagbugbog ng Red Lions sa Colegio de San Juan de Letran Knights sa Game One ng NCAA Season 101 men’s basketball championship series noong Miyerkules.

“We have to be ready. We’ve been in this situation before, we’ve played CSB without Janti, we had the opportunities to win,” ani coach Yuri Escueta.

Unang natawagan ang Fil-Am guard ng technical foul sa huling 14.6 segundo ng second quarter dahil sa pag-flop sa three-pointer attempt niya kay Letran big man Kevin Santos.

Nakuha ni Miller ang kanyang ikalawang technical sa 6:14 minuto ng fourth quarter mula sa flopping at inasar ang mga players ng Knights sa bench bago lumabas ng court.

“Medyo iba rin ‘yung pakikitungo niya sa amin. Parang medyo na-offend kami kasi nga sa pinapakita niya,” ani Letran rookie sensation Titing Manalili sa ginawa ni Miller.

Nakatakda ang Game Two bukas.