Cesafi Mi-Forfeit sa lima ka daog sa UCLM

CEBU, Philippines —   UC athletic director, coach Calib mo-apela sa desisyon

Ang Cebu Schools Athletic Foundation, Inc. miluwat og makapakurat nga desisyon bisperas sa giatngan nga CESAFI Final Four human gi-forfeit niini ang lima ka daog sa University of Cebu Lapu-Lapu and Mandaue (UCLM) Baby Webmasters isip silot sa kalapasan nga ilang nahimo sa mga lagda sa CESAFI sa dihang ang point guard nilang si Noe Lingoste miduwa sa labing torneyo samtang Season 25 sa liga nagpadayon pa.

Human maberipika nga si Lingoste miduwa gyud sa Gov. Toto Defensor Cup sa Maasin, Iloilo niadtong Nobyimbre 2, si UCLM head coach Calib Gawangon miaksiyon dayon pinaagi sa pagtangtang ni Lingoste sa ilang team tungod kay ang iyang partisipasyon klaro man nga bayolasyon sa Rule II.5 sa CESAFI General Ground Rules.

Sigun sa nalatid sa maong partikular nga lagda, ang kalapasan sa usa ka estudyanteng atleta ning probisyon moresulta sa pagka-forfeit sa mga duwa sa usa ka team diin ang hintungdan nga atleta nakaduwa.

Tungod kay ang CESAFI wala mo-isyu og pormal nga pamahayag, ang Sacred Heart School-Ateneo de Cebu (SHS-AdC) Athletic Department pinaagi sa direktor nilang si Ralph Jon Inot mipadala og suwat ngadto ni CESAFI commissioner Felix "Boy" Tiukinhoy, Jr. aron pagpangayo sa liga og klaripikasyon kabahin sa interpretasyon ug aplikasyon sa ilang mga lagda ning partikular nga matang.

Dinhi na si Tiukinhoy nimando ni Gawangon pinaagi sa usa ka suwat nga adunay petsa nga Disyembre 4, 2025 nga mopasabot pinaagi sa suwat nga ang UCLM boys basketball team dili silotan tungod sa maong insidente.

Isip tubag, si Gawangon mipasabot pinaagi sa usa ka suwat ngadto ni Tiukinhoy niadtong Diseymbre 5, 2025 nga dili sila angay silotan gumikan kay mihimo man dayon sila og makiangayon nga aksiyon human nasayud sa bayolasyon pinaagi sa pagpalagpot ni Lingoste sa ilang team ug wala na kini nila paduwaa pa sa sunod nilang mga duwa.

Matud pa ni Gawangon nga wala nila gitago ang nahitabo ug ang gibuhat ni Lingoste sa iya lamang kaugalingon og way labot niini ang tibuok team.

Apan sa makapakurat nga desisyon, ang CESAFI Technical Committee mihumon kagahapong adlawa (Sabado, Disiembre 6) nga dunay klaro nga kalapasan sa mga lagda ug misilot sa ULCM pinaagi sa pag-forfeit sa tanan nilang mga duwa diin si Lingoste nakaduwa sa wala pa ang Nobyimbre 2.

Apil niini ang lima nila ka daog batok sa University of San Jose-Recoletos (USJ-R) Baby Jaguars, San Carlos School of Cebu (SCSC) Baby Warriors, SHS-AdC Magis Eagles, Benedicto College (BC) Baby Cheetahs ug igsoon nilang koponan nga UC-Main.

Isip resulta, ang UCLM natagak sa ikasiyam nga puwesto sa final standings uban ang 3-7 win-loss rekord. Imbes nga top seed, nahanaw sila si Final Four.

Ang Magis Eagles miasumir sa numero unong luna bitbit ang 9-1 nga baraha samtang No.2 na ang 8-2 UC-Main Baby Webmasters nga naghatag kanila og twice-to-beat advantage batok sa Cebu Institute of Technology-University (CIT-U) Baby Wildcats ug Cebu Eastern College (CEC) Dragons sa semifinals nga gikatakda karong adlawa (Domingo, Disiembre 7).

Samtang ang UCLM moduso og pormal nga apela sa CESAFI Board sigun sa nalatid sa Rule IX. Nagpaabot ning maong lakang, si Tiukinhoy nagkanayon nga pinal nilang hukman ang isyu pinaagi sa usa ka Zoom meeting uban sa tanang mga hintungdan karong adlawa.