Gazz Angels balik sa trono
MANILA, Philippines — Bumalikwas ang Petro Gazz mula sa first set loss para resbakan ang ZUS Coffee, 21-25, 28-26, 25-23, 25-20, sa kanilang ‘winner-take-all’ match at kunin ang 2025 PVL Reinforced Conference crown kahapon sa Smart Araneta Coliseum.
Sinandigan ng Gazz Angels sina American import Lindsey Vander Weide, Fil-Am Brooke Van Sickle at Myla Pablo para sa kanilang ikaapat na PVL title at ikatlo sa Reinforced Conference.
Nagreyna din sila sa All-Filipino Conference noong 2024 sa likod nina Van Sickle at Pablo.
Nadiskaril naman ang hangad na ‘Cinderella finish’ ng Thundebelles na nasa kanilang unang finals stint.
Bumandera si American hitter Anna DeBeer sa pagkopo ng ZUS Coffee sa first set bago nakabawi ang Petro Gazz sa second frame patungo sa kanilang panalo.
Sa pagkopo ni American coach Gary Van Sickle sa PVL crown ay siya ang ikaapat na mentor na gumiya sa Gazz Angels sa kampeonato matapos sina Japanese Koji Tsuzurabara (2025), Rald Ricafort (2022) at Arnold Laniog (2019).
Sa unang laro, pumalo si American import Annie Mitchem ng game-high 36 points para tulungan ang Akari sa 15-25, 25-23, 21-25, 26-24, 20-18 pagtakas sa PLDT at kunin ang bronze medal.
Ito ang ikalawang third place finish ng tropa ni coach Tina Salak matapos sa nakaraang All-Filipino Conference bukod sa silver sa 2024 Reinforced Conference na napanalunan ng Creamline Cool Smashers.
“Iyong pagkapanalo namin with this match, hindi biro eh. Hindi biro na para hindi mo ma-appreciate lahat ng nakikita mo,” ani Salak. “But with team na nakita natin, holding on together, ang laki ng appreciation ko sa kanila.”
May 22 excellent sets si Mars Alba at nagdagdag si libero Justine Jazareno ng 23 digs.
- Latest
