Webmasters nagpangagot nga moresbak sa Fighting Maroons
CEBU, Philippines — Ang University of Cebu (UC) Webmasters naglungot-lungot nga makabawos sa University of the Philippines (UP) Cebu Fighting Maroons sa Cebu Schools Athletic Foundation, Inc. (CESAFI) Season 25 basketball tournament karong adlawa (Martes, Nobiyembre 18) sa Cebu Coliseum.
Magsugod ang ilang sangka sa alas 6:45 sa gabii.
Sa kasamtangan, ang Webmasters nag-una sa college division standings uban ang 7-1 win-loss rekord.
Labaw sa pagprotekta sa solong liderato, ang Webmasters nagpangagot nga moresbak sa Fighting Maroons, nga mipatilaw sa una ug bugtong nilang pildi ning season, 69-73, niadtong Septiembre 30.
Mao pa lamang kadto ang daog sa UP Cebu sa walo ka duwa.
Sa dili pa mag-abot ang UC ug ang UP, ang University of Southern Philippines Foundation (USPF) Baby Panthers ug ang Benedicto College (BC) Baby Cheetahs magbugno sa pasiunang duwa sa alas 5:15 sa hapon.
Parehong nagkupot og 3-3 nga baraha, ang Baby Panthers ug ang Baby Cheetahs buot mokulit og daog aron pahayagan ang ilang kampanya nga makasud sa Final Four.
- Latest
