Elasto Painters miangkon sa solong liderato
CEBU, Philippines — Ang Rain or Shine Elasto Painters nakaipsot sa TNT Tropang 5G, 91-89, aron angkonon ang solong liderato sa PBA Season 50 Philippine Cup niadtong Sabado sa gabii, Nobiembre 15, didto sa Aquilino Q. Pimentel Jr. Convention Center sa siyudad sa Cagayan de Oro.
Gipayaka sa Elasto Painters ang Tropang 5G gamit ang 17-8 rally sa katapusang kuwarter nga nagsilyo sa dalaygon nilang pagbangon human sila malubong og 16 puntos. Si Gabe Norwood mipupo og 16 puntos, siyam ka rebounds ug lima ka assists samtang si Gian Mamuyac mitampo og 14 puntos alang sa E-Painters nga nag-inusara na karon sa kinatas-ang dapit sa liderato uban ang 6-2 rekord.
Mikuha sab og atensiyon sila si Jhonard Clarito ug Andrei Caracut nga mipasud sa krusyal nilang mga itsa sa hilimatyong segundos aron tabangan pag-aswat ang E-Painters ngadto sa kulbahinam nga daog.
Ang Tropang 5G naparot bisan og milansang sila og 15 ka 3-pointers ug duha ka four-balls.
Sila si Rey Nambatac ug RR Pogoy mikadlit og 18 puntos matag usa samtang sila si Jordan Heading ug Henry Galinato nagkumboya'g 28 puntos.
Apan nakawang ang ilang paningkamot gumikan kay ang TNT natagak sa ikaduhang dapit kauban ang San Miguel Beermen, Magnolia Hotshots, NLEX Road Warriors ug Converge FiberXers bitbit ang managsamang 5-2 nga baraha.
- Latest
