Mayweather lamang kay Pacquiao sa rematch— Bradley

MANILA, Philippines — Posible ang muling pagtutuos nina eight-division world champion Manny Pacquiao at undefeated American fighter Floyd Mayweather Jr. sa mga darating na taon.

Sa katunayan, nabanggit ang pangalan ni Mayweather sa mga posibleng makaharap ni Pacquiao sa susunod na taon.

Ngunit wala pang detalye  ang kampo nina Pacquiao at Mayweather kung gumugulong na ang negosasyon para sa isang inaasahanhg blockbuster rematch.

At kung si dating world champion Timothy Bradley ang tatanungin, papabor ang kapalaran kay Mayweather kung matutuloy ang rematch nito kay Pacquiao.

“Mayweather’s already shown that he can beat Manny Pacquiao. I feel Mayweather still today with his age, even combined with his age, he still will serve and beat Manny Pacquiao,” ani Bradley sa panayam ng FightHype.

Naniniwala si Bradley na nasa perpektong kundisyon pa si Mayweather.

Madalas itong nakikitang nasa training kaya’t hindi ito nawawala sa magandang kundisyon.

Sa kabilang banda, si Pacquiao ay sariwa pa sa laban nito kay World Boxing Council (WBC) welterweight champ Mario Barrios noong Hulyo na nauwi sa draw.

Matatandaang tinalo ni Mayweather si Pacquiao sa kanilang unang paghaharap noong 2015.