Dobleng kalipay alang sa managsoong Gomez de Liano —

CEBU, Philippines —  Kaluhang selebrasyon ang nasinati sa managsoong Juan ug Javi Gomez de Liano human giaswat ang tagsa-tagsa nila ka mga koponan ngadto ka kadaogan sa PBA Season 50 Philippine Cup double-header niadtong Biyernes sa gabii, Nobiembre 14, didto sa Smart Araneta Coliseum.

Si Juan mipatuasik og career-high 32 puntos uban ang unom ka rebounds ug unom sab ka assists aron ituboy ang Converge FiberXers ngadto sa 106-96 nga pagpasukarap sa Barangay Ginebra   Kings.

Sa sayo pa, si Javi mibubo og 10 sa iyang 17 puntos sa ikatulong kuwarter aron pangulohan ang Magnolia Hotshots ngadto sa 90-75 nga paglampaso sa Blackwater Bossing.

Gumikan sa ilang kadaogan, ang FiberXers ug ang Hotshots mipuwersa og lima ka panagtabla tali kanila ug sa San Miguel Beermen, NLEX Road Warriors ug Rain or Shine Elasto Painters sa ikaduhang dapit sa liderato bitbit ang managsamang 5-2 rekords.

Usa lamang ka daog ang gintang nila sa TNT Tropang 5G nga nagkupot og 5-1 nga baraha.

"It's truly a special moment with our family, something we dreamt of," dason pa ni Juan.