Padayong nanginit

CEBU, Philippines —  Mikulit sa ikapitong sagunson nga daog

Ang triple double ni Cade Cunningham, buzzer-beater nga tres ni Daniss Jenkins ug dunk ni Javonte Green sa overtime miaswat sa Detroit Pistons ngadto sa 137-135 nga kadaigan batok sa Washington Wizards sa makutas nilang sangka sa NBA kagahapong adlawa didto sa Little Caesars Arena sa Detroit, Michigan.

  Si Cunningham mipasud og 14 sa 45 niya ka itsa dayon na ngadto sa pagbugwak og career-high 46 puntos uban ang 12 ka rebounds, 11 ka assists, lima ka steals ug duha ka blocks alang sa Pistons, nga nagkupot na karon og 9-2 rekord human giinat sa mainit nilang ratsada ngadto sa pito ka duwa.

Wala sab magpabitin si Jenkins nga mirehistro og career-high 24 puntos ug walo ka rebounds ingon man si Jalen Duren nga midugang og 19 puntos ug 14 ka rebounds alang sa Pistons.

Dako sab og naambag si Jenkins kansang duha ka sunod-sunod nga 3-pointers sa hilimatyong segundos sa regulasyon maoy nakapuwersa og overtime.

Si C.J. McCollum mipabuto og 42 puntos alang sa Wizards, nga nakatilaw sa ika-10 nilang pilde uban ang usa pa lamang ka daog.

Sa laing makapaisa'g balahibo nga engkwentro, si Norman Powell mibahug og 33 puntos samtang si Andrew Wiggins miamot og 23 puntos, apil na ang buzzer-beater dunk gikan sa maanindot nga pasa ni Nikola Jovic nga naghatud sa Miami Heat ngadto sa 140-138 nga pagbuntog sa Cleveland Cavaliers.

Si Donovan Mitchell mihipos og 28 puntos ug 15 ka rebounds apan naminghoy kay naputol ang upat ka sagunson nga daog sa Cavs.

Kulbahinam sab ang aksiyon didto sa Orlando, diin si Desmond Bane milansang og 3-pointer dayong kapupos sa oras aron agakon ang Magic ngadto sa 115-112 nga pagpayaka sa Portland Trail Blazers.

Si Paolo Banchero miharos og 28 puntos samtang si Bane mitali og 22 puntos alang sa Magic.

Mikuha sab og atensiyon si Victor Wembanyama uban ang 38 puntos, 12 ka rebounds, lima ka blocks ug lima ka assists aron ibandera ang San Antonio Spurs ngadto sa 121-117 nga pag-ohaw sa Bulls. Si De'Aaron Fox midugang og 21 puntos alang sa Spurs.

Si Luka Doncic mipaulbo og 38 puntos uban ang pito ka assists ug unom ka rebounds aron pangulohan ang Los Angeles Lakers ngadto sa 121-111 nga pagpakaging sa Charlotte Hornets.

Si Austin Reaves midonar og 24 puntos samtang si Rui Hachimura mitimbre og 21 puntos alang sa Lakers while Miles Bridges scored 34 points to lead the Hornets.

Didto sa Dallas, si Giannis Antetokounmpo mikolekta og 30 puntos, walo ka rebounds ug unom ka assists sa dihang ang Bucks nakaipsot sa Mavericks, 116-114.