Trollano gipasidunggan nga Player of the Week

CEBU, Philippines —  Si Don Trollano mihimo dayon og kasikas sa iyang pagbalik sa San Miguel Beermen niadtong Biyernes diin ilang nakaharong ang Magnolia Hotshots.

Si Trollano milansang og krusyal nga 4-point shot sa pinal nga 53.2 segundos aron aswaton ang Beermen ngadto sa 94-92 nga kadaogan batok sa Hotshots ug inaton ang mainit nilang ratsada ngadto sa upat ka duwa.

Mao kadto ang nagsilyo sa impresibong salida ni Trollano, nga mibirada og 29 puntos, 14 niini sa ikaduhang kuwarter diin ang Beermen miposte sa kinadak-an nilang labaw nga 18 puntos, 39-21.

Gawas sa iyang 4-pointer, si Trollano miposa sab og tulo ka 3-pointers ug milangkat og unom ka rebounds aron labnihon ang PBA Player of the Week award alang sa Nobiembre 5-8.

Dalaygon kaayo ang pagpamawi ni Trollano nga wala makapakita'g aksiyon sa miaging duwa Beermen batok sa Converge niadtong Nobiyembre 2 kay nayayay ang iyang likod.

“Sobrang sakit ng likod ko pero minanage lang ng PT namin. Medyo nabawasan naman ‘yung pain kaya nakapaglaro ako,” matud pa ni Trollano. “Nakita ko open ako.

Nakita ko parang wala na ring oras kaya tinira ko na. Kumpiyansa lang,” dason pa ni Trollano kabahin sa iyang 4-point shot.

Wala na hinoon masurprisa pa si San Miguel coach Leo Austria sa 4-pointer ni Trollano.

“During practice, he keeps on taking those 4-point shots. Even in Adamson, malayo ang range niya and he keeps on practicing that kind of shot. Minsan nga nagagalit ako kasi first pass pa lang, tinitira na. But this time, ‘yung kanyang tira, necessary ‘yun. Meron siyang sense of urgency. We need somebody who can spark from the perimeter,” kanayon pa ni Austria.

Gilupig ni Trollano sila si Kelly Williams sa TNT, Robert Bolick sa NLEX ug Jio Jalalon sa TNT alang sa senenamang pasidungog sa liga.