Foxies swak sa quarterfinalist

MANILA, Philippines — Dinakma ng Farm Fresh ang ikatlong quarterfinals ticket sa 2025 Premier Volleyball League (PVL) Reinforced Conference matapos talunin ang Petro Gazz, 25-21, 25-22, 21-25, 28-26, kahapon FilOil EcoOil Arena sa San Juan City.

Humataw si Belgian import Eli Rousseaux ng 31 points mula sa 27 attacks, tatlong blocks at isang service ace para sa 5-1 kartada ng Foxies katabla ang quarterfinalist PLDT High Speed Hitters sa ilalim ng ZUS Coffee Thunderbelles (6-0).

Nagdagdag si Trisha Tubu ng 14 markers habang may 10 points si Ces Molina at 21 excellent sets ang inilista ni Fil-Am setter Alohi Robins-Hardy.

“It’s the culmination of really six months of work, of struggle, of ups and downs, sabi ni Italian coach Alessandro Lodi. “We knew, like the team knew that we were putting in the work and investing the money necessary to hit the big jackpot in the end.”

Laglag ang Gazz Angels, ang two-time Reinforced Conference champions, sa 3-3 katabla ang Cignal Super Spikers sa No. 7 spot.

Kinuha ng Farm Fresh ang 2-0 bentahe sa laro bago nakasingit ang Petro Gazz sa third set, 25-21, sa pamumuno nina American reinforcement Lindsey Vander Weide, Fil-Ams Brooke Van Sickle at MJ Phillips.

Lumamang ang Foxies sa 23-20 sa fourth frame na naitabla ng Gazz Angels sa 23-23 bago naagaw ang set point sa 25-24.

Umiskor sina Trisha Tubu at Alohi-Hardy para sa 26-25 kalamangan ng Farm Fresh na muling naitabla ng Petro Gazz galing sa hataw ni Vander Weide.

Tinapos ng 6-foot-2 na si Rousseaux ang laro mula sa kanyang back row at crosscourt attack para sa panalo ng Foxies.