Toledo Chess Warriors nanghawod sa CEPCA 35th anniversary tourney

CEBU, Philippines — Toledo Chess Warriors mibira sa korona sa kampiyonato sa 6th Boy ‘Chessmoso’ Pestaño Memorial Tatluhan Open Chess Tournament nga gipahigayon agi'g selebrasyon sa ika-35 nga anibersaryo sa Cebu Executives and Professionals Chess Association (CEPCA) niadtong Domingo, Nobiembre 9, sa Robinsons Galleria Cebu.

Gibandera nilang Christopher Tubalado, Reduard Contaoi ug Zhy Rich Maniego, ang Toledo Chess Warriors nagtabla ug ang Check Yo' Self nilang Yves Christian Fiel, Spencer de Guzman ug Ralph Daniel Dakay nga mikumpleto sab sa pito ka hugna nga kompetisyon uban ang 12.0 puntos.

Apan ang mga Toledohanon maoy mibulsa sa P30,000 nga unang ganti kortesiya sa mas taas nilang tiebreaker. Si Fiel ug ang iyang mga kauban nakadawat og P20,000 isip second placer.

Ang GM Hector Workhorses nilang Lemuel Montero, Felix Poloyapoy Jr. ug Armecito Lumbab ug ang Kingslayer nilang Arena Grandmaster Michael Joseph Pagaran, FIDE Master Anthony Makinano ug Rey Glenn Patriarca miposte og managsamang 11.0 puntos apan ang Workhorses maoy mikubra sa P10,000 nga premyo alang sa ikatulong dapit tungod sa mas dako nilang tiebreaker.

Ang Ironeagle nilang Limuel Tampus, Marquis Angelo Mallorca ug Stephen Rosales ug ang StareMate nilang Tsedekhaor Codilla, Joselito Loquez ug Jameshwart Lopez mi-okupar sa ikalima ug ikaunom nga puwesto bitbit ang 10.0 puntos matag usa.

Miangkon sa ikapitong luna ang BCC nilang Ariel Joseph Abellana, Ian Villareal ug Kent Jeanoah Igot samtang ang The Queen's Guardian nilang Triton Blue Ares Garcia, Apple Rubin ug Zephyrr Kyle Abalo ug ang Pawn Avalanche nilang Bonn Rainauld Tibod, Bhell Ortiz ug Karl Christian Alasagas mitapos nga ikawalo ug ikasiyam. Ang Naga Warriors nilang Arena International Master Rogel Nino Panilagao, Rommel Patalinghug Sr. ug Actsel Alsala, ang Carcar City Team 1 nilang National Master Elwin Retanal, AIM Clyde Labrador ug Charlie Lapus ug ang Lionheart nilang AIM Raymond Abellana, Gamaliel Regis ug Kurt Jaden Igot mikumpleto sa Top 12 ning torneyo nga gipahinungod ni anhing Engr. Francisco “Boy” Pestaño, nga mitabang pag-establisar sa CEPCA niadtong 1990.

Sa laing bahin, ang mga board medalists mao sila si Ariel Joseph Abellana (Board 1), Marquis Angelo Mallorca (Board 2) ug Zephyrr Kyle Abalo (Board 3).

Samtang ang top performers sa tagsa-tagsa nila ka mga kategoriya mao sila si Amado Olea Jr. (Cepcan A), Archie Garson (Cepcan B), Odillon Badilles (senior), Ralph Daniel Dakay (15 Under), Kurt Jaden Igot (12 Under), The Queen Chicas (All-Lady), ug The Queen's Guardian (All-Juniors).

Giorganisa sa CEPCA ubos sa pagpangu sa presidente nilang si Jerry Maratas, ang mahinungdanong kalihukan nagmalampuson tungod sa suporta sa Jemar Engineering Services, Celjem Construction and Development Corporation, 387 Builders, Inc. ug ARQ Sports.