Bucks mitumba sa Bulls

CEBU, Philippines —   Si Giannis Antetokounmpo mipaulbo og 41 puntos sa dihang giablihan sa Milwaukee Bucks ang pagdepensa sa ilang NBA Cup title uban ang 126-110 nga pagtumba sa Chicago Bulls kagahapong adlawa didto sa Fiserv Forum Center sa Milwaukee, Wisconsin.

Ang two-time MVP mitali sab og 15 ka rebounds, siyam ka assists, duha ka steals ug duha ka steals. Mibubo siya og 19 puntos sa katapusang kuwarter nga nahimong taytayan sa Bucks ngadto sa 16 puntos nga pag-ihaw sa Bulls.

Si Matas Buzelis mihipos og 20 puntos samtang si Josh Giddey mikolekta og 16 puntos, pito ka rebounds ug 14 ka assists.

Apan ang Bulls mitugyan sa nag-unang puwesto sa Eastern Conference ngadto sa Detroit Pistons, nga mipayaka sa Brooklyn Nets, 125-107, alang sa ikalima nilang sagunson nga daog luyo sa 34 puntos gikan ni Cade Cunningham.

Sa laing bahin, si Victor Wembanyama ug ang San Antonio Spurs mipakgang sa duha ka sunod-sunod nilang pilde human giugbok si Kevin Durant ug ang Houston Rockets, 121-110.

Si Harrison Barnes maoy nangu sa Spurs bitbit ang 24 puntos, samtang sila si Wembanyama ug Julian Champagnie miamot og 22 puntos matag usa. Namawi sa Wembanyama human naposasan ngadto lamang sa kuwatro puntos sa first half.

Si Alperen Sengun mi-iskor og 25 puntos uban ang siyam ka rebounds ug walo ka assists samtang si Durant mitimbre og 24 puntos alang sa Rockets, nga wala makasustinir sa ilang kainit human miabante og 11 puntos hinungdan nga napakgang ang lima ka sagunson nga daog.

Didto sa Sacramento, ang Oklahoma City Thunder dali nga namawi human nakatilaw sa una nilang pilde ug gipahimungtan sa ilang kapungot ang Kings, 132-101.

Si Isaiah Hartenstein miharos og 33 puntos ug 19 ka rebounds samtang si Shai Gilgeous-Alexander midugang og 30 puntos alang sa Thunder.

Wala sab magpabitin si Nikola Jokic, nga mikadlit og 26 puntos, siyam ka rebounds ug siyam ka assists aron ituboy ang Denver Nuggets ngadto sa 129-104 nga pagpakaging sa Golden State Warriors nga napiangan kay wala ang nayayay nilang alas nga si Stephen Curry.

Sa ubang mga resulta, ang Minnesota Timberwolves mibugha sa Utah Jazz, 137-97, ang Cleveland Cavaliers mipaksit sa Washington Wizards, 148-114, ang Memphis Grizzlies mibihag sa Dallas Mavericks, 118-104, samtang ang Miami Heat mipabuto og franchise record nga 53 puntos sa unang kuwarter dayon na ngadto sa 126-108 nga paglampornas sa Charlotte Hornets.