Elasto Painters miangkon sa solong liderato

CEBU, Philippines — Si Anton Asistio mikuha og atensiyon sa dihang gipakaging sa Rain or Shine Elasto Painters ang Phoenix Super LPG Fuel Masters, 91-80, aron angkonon ang solong liderato sa PBA Season 50 Philippine Cup niadtong Miyerkules sa gabii, Nobiembre 5, didto sa Ninoy Aquino Stadium sa kaulohan.

Si Asistio mikadlit og otso puntos apil na ang duha ka krusyal nga 3-pointers sa nagbagang 15-2 rally nga naghatud sa Elasto Painters ngadto sa 82-73 nga labaw dayon na ngadto sa ikaupat nilang sagunson nga daog.

Sa kinatibuk-an, si Asistio mikulit og 20 puntos aron suportaan ang 22 puntos ni Gian Mamuyac alang sa E-Painters, nga nag-inusara na karon sa kinatas-ang dapit sa standing bitbit ang 5-1 rekord.

Sa laing resulta, ang Titan Ultra Giant Risers mipakgang sa upat ka sunod-sunod nilang pilde human gibuntog ang Blackwater Bossing, 97-86.

Si Calvin Abueva mirehistro sa ikatulo niyang sagunson nga double-double uban ang 23 puntos ug 14 ka rebounds samtang si Joshua Munzon miamot og 18 puntos alang sa Giant Risers.

Mihimo sab og kasikas si Fran Yu, nga mitagak og 10 sa iyang 14 puntos sa katapusang kuwarter aron tabangan ang Titan pag-inat sa ilang baraha ngadto sa 2-4.