Celtics mipatilaw og pilde sa sixers, bulls 5-0 na

CEBU, Philippines —  Si Jaylen Brown mipaulbo og 32 puntos sa dihang gipatilaw sa Boston Celtics og pilde ang Philadelphia 76ers,

109-108, ning lab-as pang 2025-26 NBA season kagahapong adlawa didto sa Wells Fargo Center sa Philadelphia, Pennsylvania.

Ang duha ka free throws ni Brown sa pinal nga 32.9 puntos maoy nagsilyo sa kulbahinam nilang daog.

  Tam-is nga panimalos ang nakab-ot sa Celtics, nga gipayaka sa 76ers, 117-116, sa una nilang duwa didto sa Boston. Ang Celtics nagkupot na og 3-3 rekord human gipakgang sa upat ka sagunson nga daog sa Sixers.

Duna pa untay tsansa ang 76ers nga modaog apan si Joel Embiid nasipyat sa iyang 3-pointer dayong kapupos sa oras.

Si Tyrese Maxey maoy nangu sa Philadelphia uban ang 26 puntos ug 14 ka assists samtang si Embiid mitali og 20 puntos sa pilderong kawsa.

Sa laing bahin, ang Chicago ulls miinat sa perpekto nilang baraha ngadto sa 5-0 human gipakaging ang New York Knicks, 135-125

Sila si Josh Giddey ug Nikola Vucevic nagkumbinar og 58 puntos alang sa Bulls.

Si Jalen Brunson mikadlit og 29 puntos apan nahoyhoy ang iyang abaga kay ang Knicks natagak sa 2-3.

Didto sa Memphis, si Luka Doncic nagparamdam dayon sa iyang pagbalik uban ang 44 puntos, 12 ka rebounds ug unom ka assists aron ituboy ang Los Angeles Lakers ngadto sa 117-112 nga pagbugha sa Grizzlies.

Si Kawhi Leonard mi-iskor og 34 puntos apil na ang game-winning basket sa 126-124 nga pagpiog sa Los Angeles Clippers batok sa New Orleans, samtang si Jerami Grant miposa og duha ka free throws sa katapusang 1.4 segundos aron aswaton ang Portland Trail Blazers ngadto sa 109-107 nga pagbihag sa Denver Nuggets.

Sa ubang mga resulta, si Devin Booker mipupo og 36 puntos sa dihang gipaksit sa Phoenix Suns ang Utah Jazz, 118-96, si Jalen Johnson mikolekta og 22 puntos ug 13 ka rebounds aron paluparon ang Atlanta Hawks ngadto sa 128-108 nga paglampornas sa Indiana Pacers, samtang sila si Brandon Ingram, RJ Barrett ug Jamison Battle miposte og 20 puntos matag usa sa dihang gipakuratan sa Toronto Raptors ang Cleveland Cavaliers, 112-101.