Road warriors binangga ng Dyip
MANILA, Philippines — Nakamit ni Terrafirma rookie coach Ronald Tubid ang kanyang unang panalo sa PBA Season 50 Philippine Cup.
Ito ay matapos banggain ng Dyip ang NLEX Road Warriors, 97-91, tampok ang 18 points ni No. 56 overall pick JM Bravo kahapon sa Ynares Center sa Antipolo City.
Huling nanalo ang Terrafirma noong Abril 5 sa pagbubukas ng Season 49 Philippine Cup kung saan nila dinaig ang Phoenix, 95-87.
“Good thing naka-bounce back kami at hindi mabaon. Nag-respond talaga iyong mga bata sa challenge,” ani Tubid sa naunang 87-107 kabiguan ng Dyip sa Blackwater Bossing.
Hindi nasundan ng Road Warriors ang kanilang 85-84 paglusot sa nagdedepensang San Miguel Beermen.
Muntik mabalewala ang itinayong 16-point lead ng Terrafirma, 78-62, sa pagbubukas ng fourth quarter nang makalapit ang NLEX sa 91-93 sa huling 59.4 segundo.
Ang scoop shot ni Jerrick Ahanmisi ang muling naglayo sa Dyip sa 95-91 sa natitirang 37.1 segundo, habang ang undergoal shot ni Bravo sa huling 12.3 segundo ang sumelyo sa kanilang panalo sa Road Warriors.
Nagdagdag si Ahanmisi ng 14 points para sa Terrafirma habang may tig-13 at 11 markers sina Paolo Hernandez, Didat Hanapi at Louie Sangalang, ayon sa pagkakasunod.
Pinamunuan nina JB Bahio at Xyrus Torres ang NLEX sa kanilang tig-14 points kasunod ang tig-13 markers nina Jonnel Policarpio at Brandon Ramirez.
Kasalukuyan pang naglalaro ang Beermen at Fuel Masters habang isinusulat ito kagabi.
- Latest
