Leksiyon sa trahedya

Makaguol nga hitabo ang nasinati natong mga Sugbuanon human usa ka makusog nga linog ang mitay-og sa amihanang bahin sa probinsiya tangkod semana na ang milabay.

Mga edispisyo nangagusbat, mga kabalayan nangahugno, mga patigayon nangabungkag, ug ang nakapait sa tanan, daghang kinabuhi ang nakalas sa wala damha nga katalagman nga miigo sa siyudad sa Bogo ug silingan niining mga lungsod sa San Remigio, Medellin, Daanbantayan, Tabogon, Borbon, Tabuelan ingon man ang among isla sa Bantayan.

Makaluluoy ang kahimtang sa atong mga kaigsoonan didto sa Norte. Sakit man tuod palandongon apan atong dawaton ang gihampak sa kinaiyahan kay dili man nato kontrolado ang dagan sa atong kinabuhi. Sa pag-aninaw nako sa sitwasyon, nakat-on ko og daghang mga leksiyon.

Nga kita mag-andam sa kanunay kay wala ta masayud kon unsay mahitabo sa umaabot. Walay matagna kon unsay madangatan nato sa unahan.

Nga kita nagpuyo ning kalibutana dili sa matag oras nungka sa matag gutlo apan sa matag higayon.

Nga sa kanunay kita mangaliyupo sa kahitas-an kay mao kini ang labing gamhanan natong taming batok sa mga dautan.

Nga ang panagdait nato sa atong isi'g katawo pirmeng mosidlak sa atong dughan taliwala sa kalisdanan. Testamento niini, nagsugwak ang malumo og kasingkasing nga wala igsapayan ang risgo aron lamang makahatud sa dinalian nilang hinabang.

Nga maghiusa ug mag-ambahan kita sa pagbangon gikan ning makapakurat nga trahedya nga mihagwa sa atong dalan.

Masaligon kaayo ko nga ato malampasan kining laing pagsulay kay nasukod na man ang atong kalig-on ug lahutay sa grabing mga kalamidad nga atong naagian, gikan pa sa bagyong Ruping ngadto Yolanda hangtud sa Covid-19 nga pandemiya nga gitiwasan pa sa bagyong Odette.

Kaya nato ni ilabi na kon isalig nato ang tanan sigun sa kabubut-on sa Ginoo ka siya maloloy-on ug dili ta niya pasagdan. Kinahanglan lang magpabilin ta nga malaumon ug maampoon. Magtinabangay ta aron makabarog nga mas lig-on gikan ning dakong hagit sa panahon. Dasig ug laban lang gyud ta mga Sugbuanon!