Jaguars mikulit sa unang daog

CEBU, Philippines —  Ang University of San Jose-Recoletos (USJ-R) Jaguars miwani sa Cebu Institute of Technology-University (CIT-U) Wildcats, 76-63, alang sa una nilang daog sa Cebu Schools Athletic Foundation, Inc. (CESAFI) Season 25 basketball tournament niadtong Biyernes, Oktubre 3, sa Cebu Coliseum.

Si Fritz Gonzales miposte og 16 puntos ug duha ka rebounds samtang si Christian Carl Sollano, nga kausa lamang masipyat sa walo niya ka tira, mipupo og 14 puntos, 10 ka rebounds, tulo ka assists, usa ka steal ug usa ka block aron tabangan ang Jaguars nga makarekober gikan sa duha ka sagunson nga pilde.

Ang Jaguars alkansi og sayes puntos, 24-30, sa naghinapos nga bahin sa ikaduhang kuwarter apan milusad og bagsik nga ataki sa second half aron pahagbaon ang Wildcats ngadto sa ikatulo niining pilde sa upat ka duwa.

Biya gihapon og dos puntos, 30-32, sa halftime, ang Jaguars kalit lang nagmangtas ug milampaso sa Wildcats, 36-16, sa tunga-tungang bahin sa ikatulo ug ikaupat nga kuwarter aron pag-abante og 18 puntos, 66-48, sa pinal nga singko minutos.

Si Serafin Duarte maoy bugtong CIT-U player nga nakahipos og double-digit uban ang 12 puntos, lima ka rebounds, upat ka assists, duha ka steals, ug duha ka blocks.

Sa high school division, ang University of Cebu Lapu-Lapu and Mandaue (UCLM) Baby Webmasters migamit sa nagkayo nilang 30-7 nga sinugdananan aron dominahon ang San Carlos School of Cebu (SCSC) Baby Warriors, 81-70.

Si Dan Mitchell Ferraren ang sentro sa balanseng opensa sa UCLM bitbit ang 17 puntos, tulo ka rebounds, tulo ka assists, ug duha ka steals.

Mitali si Noe Lingoste og 16 puntos, unom ka rebounds, lima ka assists, ug tulo ka steals, si Rafael Calo midugang og 15 puntos, unom ka rebounds, usa ka assist, ug tulo ka steals samtang si Wade Adam Luche mitampo og 13 puntos, unom ka rebounds, usa ka assist, ug tulo ka assists sa dihang ang UCLM miinat sa ilang baraha ngadto sa 2-1.

Si Neil Ashley Ibarita ang nangu sa Baby Warriors uban ang 17 puntos, lima ka rebounds, duha ka assists, ug lima ka steals.   

Si Joshua Pilapil mirehistro og double-double nga 16 puntos ug 10 ka rebounds uban ang duha ka assists ug tulo ka steals samtang sila si Heath Lauren Macapil ug John Khino Buslon nagkumbinar og 25 puntos ug 15 ka rebounds apan silang tanan naminghoy kay ang batan-ong mga Carolinians nagpabiling bokya human sa upat ka duwa.