Eala olats kay Golubic
Sa quarterfinals ng Suzhou Open
MANILA, Philippines — Bigo si Pinay netter Alex Eala na masundan ang matikas na ratsada nito matapos yumuko kay Viktorija Golubic ng Switzerland, 6-2, 2-6, 6-7, sa quarterfinals ng 2025 Suzhou Open WTA 125 sa Sungent International Tennis Center sa China.
Bakbakan ang laban mula umpisa hanggang dulo kung saan kinatigan ng suwerte si Golubic sa huling sandali ng laro.
Mainit na sinimulan ni Eala ang ratsada nito para mabilis na kunin ang 1-0 bentahe sa first set.
Subalit rumesbak ang Swiss netter nang umarangkada ito nang husto sa second set para maitabla ang laro sa 1-1.
Naantala ang laro dahil sa ulan bago magsimula ang final set.
Sa pagbabalik ng laro, gumamit na ng malalim na karasanan si Golubic para makuha ang 5-3 abante.
Hindi naman basta-basta sumuko ang Pinay bet para maitabla sa 5-all.
Nakuha pa ni Eala ang 6-5 bentahe at ilang match point opportunity ngunit kinapos ito.
Sa tiebreak ay tuluyan nang dinomina ng Swiss player ang laro nang magpasabog ito ng 7-0 run para makuha ang panalo.
Bigo si Eala na umentra sa semis sa unang pagkakataon sapul noong Guadalajara Open sa Mezico City.
Una na siyang nakapasok sa semis sa Jingshan Tennis Open noong nakaraang linggo.
Sesentro na ang atensiyon ni Eala sa mas prestihiyosong Wuhan Open na lalahukan ng mga top players sa mundo kabilang na sina Wimbledon champion Iga Swiatek ng Poland at French Open champion Coco Gauff.
Daraan pa sa qualifying round si Eala para makahirit ng tiket sa Wuhan Open na isang 1000-level WTA tournament.
- Latest
