Ganzon, Bustillo misidlak sa CEPCA monthly

CEBU, Philippines — Sila si Ronald Ganzon ug Mario Bustillo, Sr. milugwa nga mga kampiyon sa Septiembre nga edisyon sa Cebu Executives and Professionals Chess Association (CEPCA) monthly tournament sa Robinsons Galleria Cebu niadtong weekend.

Si Ganzon mikumpleto sa lima ka hugna nga kompetisyon uban ang perpektong 5.0 puntos aron langkaton ang Class A title.

Sila si National Master Arnolito Cadiz ug Arena International Master Dennis Navales parehong mikadlit og 4.5 puntos apan si Cadiz ang mipahiluna sa ikaduhang dapit tungod sa mas taas niyang tiebreaker.

Sa iyang bahin, si Bustillo mitali og 4.5 puntos aron birahon ang korona sa Class B.

Sila si Arena Grandmaster Kevin Codinera ug Karl Christian Alasagas miposte og managsaamang 4.0 puntos apan si Codinera ang nalandig sa ikaduhang puwesto, salamat sa mas dako niyang tiebreak output.

Gawas sa ganting salapi kortesiya ni CEPCA President Engr. Jerry Maratas, sila si Ganzon ug Bustillo nakaangkon sab og luna sa grand finals nga giulohan og “CEPCA Battle of Champions” karong Disiyembre.

Sa laing bahin, sila si Ma. Theresa Miranda (female) ug Theon Cade Miranda (12 Under) maoy mga top performers sa tagsa-tagsa nila ka mga kategoriya.