Knak Awt: Mapasigarbuhon nga lawisanon

CEBU, Philippines — Sa miaging bulan, midalikyat ko didto sa among isla sa Bantayan alang sa usa ka mahinungdanong katuyoan. Usa lagi ta sa mga dinapit sa pormal nga paglusad ingon man pagpanghatag og kopya sa makasaysayanong edisyon sa The KOTA Chronicle - ang labing unang school paper publication sa Madridejos Community College. Nahimo pang mas espesyal ang okasyon kay natumong man kini sa ika-20 nga anibersaryo sa pagkatukod sa MCC niadtong Septiembre 5.

Sangko sa langit ang gibati nakong kalipay niadtong tungora. Samtang nagpadayon ang programa, nagkapamalandong ko sa hilom kay sa kadugayan, nahatagan na gyud og katumanan ang gihandum sa akong dughan. Kay sa kadaghan na nako'g naadtoan isip lecturer sa campus journalism sud sa dul-an tulo na ka dekada, wala pa gyud ko makaserbisyo sa mismong lugar nako.

Hangtud nga mitugdon ang bulawanong oportunidad sa akong mga palad. Nagsugod ang tanan niadtong Pebrero sa dihang nakadawat ko og tawag  gikan sa kanhi nako titser sa high school nga si mam Flor Alolod Montecillo nga karon doktor na sa edukasyon ug maoy naglingkod nga presidente sa MCC.

Si mam Flor mihangyo nga mahimo ba nako silang tabangan pagporma og school paper alang sa MCC. Taliwala sa among panag-estorya, daw sa naglumpayat ang akong kasingkasing sa tumang pagmaya kay miabot na gyud ang kahigayonan nga akong makab-ot ang dugay na nakong gitinguha.

Tuod man, sa hinay-hinay migiya ko nila ni mam Flor paghulma sa ilang mantalaan inabagan sa higala nakong si Cahms Allego, nga maoy nagdisenyo ug naghan-ay sa ilang mga artikulo. Wala namo igsapayan nga mogahin og panahon kay gawas nga kabahin kini sa among adbokasiya pagsabwag sa tinuoray nga mensahe sa journalismo sa mga kabatan-onan, tsansa sab nako kini nga makahatag ko og balik sa yuta nakong natawhan.

Dili sayon ang ilang naagian. Dunay daghang mga hagit ug pagsulay nga mihampak sa ilang dalan sa miaging pito ka bulan. Apan luyo sa pagpursige ug paningkamot ni mam Flor ug Editor-in-Chief Arisa Cordeniel inubanan sa hugtanong suporta ni Mayor Romeo Villaceran, nahimugso ang The KOTA Chronicle. Dili lamang kini tingog nga mopalanog sa mga isyu kabahin sa MCC apan tigsabwag sab sa mga panghitabo sa among komunidad pinaagi sa matinud-anon, patas, ensakto, ug responsable nga pagbalita.

Dili sa pag-alsa sa kaugalingon nakong bangko apan dako nakong dungog nga nahimo kong tipik sa kasaysayan sa among lungsod. Nga pinaagi sa akong propesyon, duna koy nahimo nga kaayuhan alang sa akong mga kababayan. Bililhon kining butang nga akong mahandum sa tibuok nakong kinabuhi. Daghan nako'g lugar nga naabtan dinhi man sa atong nasud o sa langyawng lapyahan. Apan dili mahitabo nga mahikalimtan nako ang ubos nakong sinugdanan. Sa kanunay ako molingi nga mapasalamaton kon diin ako gikan kay ako mapasigarbuhon nga usa ka Lawisanon.

Kon dunay mga pangutana, komento, o reaksiyon mahimong mo-email sa [email protected]