15th Alegado Cup: Semifinalists sa SK category kumpleto na

CEBU, Philippines — Ang Jugan, Cabangahan, Casili, ug Tugbungan maoy naglangkob sa mga semifinalists sa SK category sa 15th Mayor Teresa Alegado Cup basketball tournament didto sa Consolacion, Cebu.

Si Kyle Japitan mikadlit og 19 puntos, pito ka rebounds ug upat ka assists sa dihang gitagak sa Jugan ang Tayud, 101-97, aron paglukat og tiket sa semis.

Sila si Lester Cañete ug Jeffrey Brua nagkumbinar og 27 puntos alang sa Jugan, nga makigharong sa Cabangahan sa Final Four.

Ang Cabangahan miabante human gipalagpot ang Lamac, 78-73.

Si John Kervin Garcia mipupo og 26 puntos, upat ka assists ug upat ka rebounds samtang si Junel Colubio midugang og 18 puntos, pito ka rebounds ug tulo ka assists alang sa Cabangahan.

Sa laing bahin, ang Tugbungan ug Casili mipabakasyon sa tagsa-tagsa nila ka mga karibal aron pagplastada sa ilang kaugalingon ngadto sa tinagakay nga duwa sa semis.

Ang Tugbungan mipatikangkang sa Poblacion Occidental, 106-86, samtang ang Casili mibugha sa Pulpogan, 104-67.

Si Stephen Cordovan maoy nangu sa Tugbungan uban ang 23 puntos, walo ka rebounds ug unom ka six assists. Si Dominic Tumulak midugang og 18 puntos, lima ka rebounds ug tulo ka assists samtang si Lyco Boroso mitampo og 16 puntos, upat ka rebounds ug duha ka assists.

Si JB Macanas ang bida sa Casili bitbit ang 24 puntos, unom ka rebounds, lima ka assists, ug duha ka two steals samtang si Reezan Gonzaga mitimbre og 12 puntos, lima ka assists ug lima ka steals.