Cheetahs nagmangtas

CEBU, Philippines —  Ang Benedicto College (BC) Cheetahs mikadlit og kaluhang daog sa Cebu Schools Athletic Foundation, Inc. (CESAFI) Season 25 basketball tournament sa Cebu Coliseum niadtong weekend.

Si Kenneth Babalcon miharos og 13 puntos, lima ka rebounds, walo ka assists ug duha ka steals sa dihang gilatigo sa Cheetahs ang Cebu Institute of Technology-University (CIT-U) Wildcats, 68-51, alang sa ikaduha nilang sagunson nga daog.

Midugang si Jhon Loufred Diamante og 11 puntos alang sa Cheetahs, nga nakigduyog sa mga higante sa liga nga University of the Visayas (UV) Green Lancers ug University of Cebu (UC) Webmasters sa kinatas-ang dapit sa liderato uban ang managsamang 2-0 rekords. Ang Cheetahs modimonar sa Wildcats. Misutoy sila sa sayong 14-4 nga labaw dayon na ngadto sa pag-establisar og 25 puntos nga bentaha, 68-43, sa naghinapos nga bahin sa duwa.

Sila si Serafin Duarte ug John Rey Guinita nagkumbinar og 24 puntos, pito ka rebounds, tulo ka assists ug duha ka steals apan nangahoyhoy ang ilang abaga gumikan kay ang Wildcats nasugamak sa laing kapildihan.

Sa laing sangka sa college, ang University of Southern Philippines Foundation (USPF) mihatag ni Paul Alelu Flores sa una niining daog isip bag-ong head coach sa Panthers human gipakaging nila ang University of the Philippines (UP)-Cebu Fighting Maroons, 68-56.

Si Janjan Peteros mibulsa og 16 puntos, unom ka rebounds, usa ka assist ug usa ka steal samtang si Paolo Dalumpines mihipos og 14 puntos, tulo ka rebounds, pito ka assists ug duhas ka steals alang sa Panthers, nga wala na molingi pa sukad sila mirehistro og 34-14 nga bentaha sa naghinapos nga bahin sa first half.

Si Andrew Padilla mitapos uban ang 15 puntos ug walo ka rebounds samtang si Wenraye Sarol mikolekta og 14 puntos, unom ka rebounds, upat ka assists ug upat ka steals apan wala mosaler ang maanindot nilang salida gumikan kay ang Fighting Maroons naparot sa ikaduhang sunod-sunod nga higayon.

Sa high school division, ang Baby Cheetahs miihaw sa Don Bosco Technical College (DBTC)-Cebu Greywolves, 77--57, alang sa una nilang daog.

Si Kyle Nalisa maoy nangu sa Baby Cheetahs uban ang 19 puntos, tulo ka rebounds, usa ka assist ug lima ka steals. Nakakuha siya og dakong suporta gikan nilang Ceasar Bigcas ug Zhyd Pialago nga nagkumboya'g 31 puntos, 13 ka ka rebounds, walo ka assists ug upat ka steals.

Bugtong si Daniel Cerilles, Jr. ang miposte og double-digit alang sa pilderong Greywolves uban ang 15 puntosm tulo ka rebounds, duha ka assists ug duha ka steals.

Sa laing resulta, si Henry Kristoffer Suico mitagak og 18 puntos, walo ka rebounds, tulo ka assists, tulo ka steals ug usa block sa dihang giablihan sa Sacred Heart School-Ateneo de Cebu (SHS-AdC) Magis Eagles ang ilang kampanya alang sa makasaysayanong "five-peat" pinaagi sa 69-57 nga pagpayaka sa University of San Jose-Recoletos (USJ-R) Baby Jaguars. Human sa 42-42 nga panagtabla, ang Magis Eagles milusad og nagkayong opensiba aron pag-abante og 17 puntos, 69-52, nga nakapabarag sa Baby Jaguars sa hilimatyong segundos.

Si Lian Kent Basa mitimbre og 14 puntos, lima ka rebounds, usa ka assist, usa ka steal ug usa ka block samtang si Gabriel Cabibihan mitampo og 10 puntos, tulo ka rebounds, duha ka assists, duha ka steals ug usa ka block alang sa Magis Eagles.

Si Krstc Ryll da Silva mitali og 17 puntos, walo ka rebounds ug usa ka steal alang sa Baby Jaguars, nga napukan sa ikaduhang higayon sud sa tulo ka duwa.