12 rookies isasalang ng Junior Altas

MANILA, Philippines — Optimistiko si head coach Joph Cleopas na maidedepensa ng kanyang University of Perpetual Help System DALTA Junior Altas ang korona sa darating na NCAA Season 101 juniors' basketball tournament.

Ito ay sa kabila ng pagpaparada ng Junior Altas sa 12 rookies at anim na holdovers sa pagbubukas ng torneo sa Oktubre 1 sa Smart Araneta Coliseum sa Cubao, Quezon City.

Kinopo ng Las Piñas City-based team ang kauna unahang korona sa NCAA Season 100 sapul nang sumali sa liga noong 1985 kontra La Salle Greenhills kung saan itinanghal na Season at Finals MVP si Lebron Jhames Daep.

Lumipat na ang 6-foot-7 na si Daep sa La Salle Green Archers sa UAAP.

Si Icee Callangan ay nagtungo sa Mapua Cardinals, habang umakyat sa Altas seniors team sina JD Pagulayan, Jan Roluna, Aries Borja, Jericho Cristino, Kelsey Baldoria at TJ Tabbuan.

Sa kabila nito ay naniniwala si Cleopas na maipagtatanggol ng Junior Altas ang titulo sa pamumuno nina holdovers Louie Rosales, team captain Lance Nitura, Jim Corpuz, Renzo Zanoria, Ezekiel Zamoras, Kurt Patalinghug at Kurt Velasquez.

Isasalang din ng Perpetual sina Batang Gilas standout Rayven Restificar, Brent Rosales, Jones Ferrer, Hanz Llupar, Jude Binagatan, Daniel Dulanas CeeJay Catillejo, Manu Ignacio, Arkin Cristobal, Emmanuel Villaruel at Vandolf Urdaneta.

Unang hahamon sa Junior Altas ang San Sebastian Staglets sa Oktubre 3 sa FilOil EcoOil Centre sa San Juan City.