Talisay giunhan ang minglanilla

CEBU, Philippines — Korona sa Gullas Cup ang tirada karong gabii Ang Talisay Aksyon Agad milusad og eksplosibong opensiba sa ikatulong kuwarter aron pakagingon ang defending champion Abante Minglanilla, 64-60, sa Game 1 sa ilang best-of-three finals sa Rhea Gullas Cup 2025 Tungod niini, ang Talisay ni coach Ronald "Magic" Bucao nanginahanglan og usa na lang ka daog aron angkonon og balik ang trono nga giilog kanila sa Minglanilla sa miaging tuig.

Mahimo kining makab-ot sa Talisay sa Game 2 karong alas-7 sa gabii sa Minglanilla Sports Complex apan angayan silang mangandam sa usa ka dakong gubat batok sa Minglanilla nga seguradong makigpatay didto sa ilang balwarti aron buhion ang ilang tinguha nga mapanalipdan ang ilang titulo.

Sa sinugdanan, nindot ang gipakitang labok sa Minglanilla nga nakabentaha pa og 13 puntos, 31-18, sa sayong bahin sa ikatulong kuwarter.

Apan ang Talisay sa kalit lang nagmangtas ug mitagak og 29-7 nga bomba aron usbon ang dagan sa duwa pabor kanila uban ang nuybe puntos nga labaw, 47-38.

Taliwala sa mainit ug napuno sa tensiyon nga kumbati, ang Talisay milahutay ngadto sa kuwatro puntos nga kadaogan.

Si Kristian Henry Alejandrino maoy bugtong player sa Talisay nga mirehistro og double-digit uban ang 10 puntos nga iyang gipalamanan og wako ka rebounds, lima ka assists ug tulo ka steals. Si Benedick Alforque maoy nangu sa Minglanilla bitbit ang 18 puntos, upat ka rebounds, duha ka assists ug unom ka steals samtang si Kurt Denver Erediano adunay 13 puntos ug 13 sab ka rebounds sa pilderong kawsa.-