Magis Eagles mosikad sa ilang 'five-peat' nga misyon Mga duwa karon

CEBU, Philippines — Ang Sacred Heart School-Ateneo de Cebu (SHS-AdC) Magis Eagles magsugod sa ilang kampanya alang sa  rekord nga five-peat sa Cebu Schools Athletic Foundation, Inc. (CESAFI) Season 25 baskeball tournament karong adlawa (Domingo, Septiembrec21) sa Cebu Coliseum. Una sa listahan ang University of San Jose-Recoletos (USJ-R) Jaguar Cubs. Magbugno sila sa alas-2 sa hapon. Ang Magis Eagles midominar sa miaging upat ka seasons sa liga apil na niadtong 2019 sa wala pa miulbo ang kalibutanhong pandemiya.

Ang Ateneo Hearters mikumpleto dayon og Grand Slam gikan sa 2022 ngadto sa 2024 nga naghimo kanilang labing daogan nga high school team sa CESAFI uban ang walo ka titulo sa kampiyonato.

Karon, ilang gisaytan ang makasaysayanong ikasiyam nga korona ubos sa paggiya ni coach Rommel Rasmo.

Sa laing sangka sa high school, ang Don Bosco Technical College (DBTC)-Cebu Greywolves nanghinaut nga motali og laing daog sa dihang makigharong sila sa  Benedicto College (BC) Baby Cheetahs sa alas 12:30 sa hapon.

Sa collegiate division, ang University of Southern Philippines     Foundation (USPF) Panthers ug ang  University of the Philippines (UP) Cebu Fighting Maroons parehong naglaraw nga mokulit og daog sa dihang magbangga sila sa alas 3:30 sa hapon.

Sa main game sa alas-5 sa hapon, ang BC Cheetahs nagtinguha sa ikaduha nilang sagunson nga daog sa dihang makigbugno sila sa Cebu Institute of Technology-University (CIT-U) Wildcats.-