Pacquiao nakurat, miyukbo ni Hatton

CEBU, Philippines — Si Pinoy ring legend Manny Pacquiao nakurat sa kalit nga pagpanaw ni Ricky Hatton dayong padangat sa iyang payukbo sa Briton niyang karibal nga iyang gihulagway nga usa ka ngilngig nga boksidor nga adunay malumo nga kasingkasing.

Si Pacquiao, kansang makapakugang nga pag-knockout ni Hatton sa ikaduhang hugna niadtong 2009 didto sa Las Vegas nakapasukarap sa karera sa garbo sa Britanya, nagkanayon nga nakigsawo siya uban ni Hatton sa dili mahikalimtan nga mga hitabo sa kasaysayan sa boksing.

"I will always honor the respect and sportsmanship he showed," padayag pa ni Pacquiao.

"Ricky fought bravely, not just in the ring, but in his journey through life," dugang pa sa bugtong eight-division world champion.

Ang 46-anyos nga si Hatton napalgan nga patay na kagahapong adlawa sa iyang balay didto sa Hyde, northwest England pipila lamang ka semana sukad iyang gi-anunsiyo nga mobalik siya sa boksing pinaagi sa usa ka propesyonal nga away batok ni Eisa Al Dah didto sa Dubai karong Disiyembre.Gibansagan og "The Hitman", si Hatton nakasakmit og pipila ka kalibutanhong titulo sa light welterweight division ug kausa sa welterweight.

Misikat sa agresibo niyang istilo, si Hatton nakadaog batok nilang Kostya Tszyu ug Jose Luis Castillo sa wala pa siya makatilaw og mapait nga kaparotan sa mga kamot ni Floyd Mayweather ug dayon ni Pacquiao nga nakaparetiro niya.